दुई पटक पछि परेको नतिजा उल्टाउँदै बायर्नलाई हरायो डर्टमुन्डले
प्रकाशित २०७५ कार्तिक २५ आइतबार
120
Shares
काठमाडौं । जर्मन बुन्डेस्लिगा फुटबलमा दुई पटक पछाडि परेको अवस्थालाई उल्टाउँदै बोरुसिया डर्टमुन्डले बायर्न म्युनिखलाई पराजित गरेको छ । शनिबार राति भएको खेलमा साविक विजेता म्युनिख ३–२ ले पराजित भयो ।
लिगको शीर्ष स्थानमा रहेको डर्टमुन्डले घरेलु मैदानमा बायर्नलाई हराएसंगै उपाधि दावेदारी बलियो बनाएको छ । बायर्न भने ११ चरणको समाप्ति हुँदासम्म कम्तीमा चौथो स्थानमा धकेलिने छ ।
यस्तो छ डर्टमुन्ड–बायर्न खेलको रोमाञ्चकता
खेलमा बायर्नले प्रारम्भिक अग्रता लिएको थियो । बोरुसियाका पूर्व खेलाडी रोबर्ट लेवान्डोस्कीले २६ औं मिनेटमा गोल गर्दै अग्रता दिलाए । उनले क्रसमा ६ यार्ड बक्स भित्रबाट हेडरमार्फत गोल गर्दै अग्रता दिलाएका थिए । निकै प्रतिप्स्पर्धात्मक खेलको पहिलो हाफमा घरेलु टोली १–० ले पछाडि पर्यो ।
दोस्रो हाफमा भने डर्टमुन्डले उत्कृष्ट पुनरागमन गर्यो । दोस्रो हाफको सुरुवातमै कप्तान म्यानुएल नोएरले रिउसलाई पेनाल्टी क्षेत्रभित्र लडाएपछि प्राप्त पेनाल्टीमा रिउसले कुनै गल्ति गरेनन् र खेल बराबरीमा आयो ।
त्यसको ५ मिनेट नबित्दै बायर्नले पुन अग्रता लियो । बायर्नका लागि लेवान्डोस्कीले पुन हेडर गोल नै गरे । ६७ औं मिनेटमा रिउसले गोल गर्दै खेल बराबरीमा ल्याए ।
त्यसको केहि बेरमा नै स्पेनिस क्लब बार्सिलोनाबाट ऋणमा आएका पाको अल्कासेरले गोल गर्दै अग्रता दिलाए । खेलको अन्तिम मिनेटमा लेवान्डोस्कीले मौका पाएर गोल गरेपनि रेफ्रीले अफसाइड दिएका थिए ।
पछिल्लो ६ सिजन लगातार लिग उपाधिमा कब्जा जमाएको बायर्न ११ खेलको समाप्तिमा तेस्रो स्थानमा छ । शीर्षस्थानको डर्टमुन्डभन्दा बायर्न ७ अंकले पछाडि छ ।
बायर्नले ११ खेल २० अंक जोडेको छ भने डर्टमुन्डको ११ खेलमा २७ अंक छ । दोस्रो स्थानमा रहेको बोरुसिया मोन्चेन्ग्लाडबाकको ११ खेलमा २३ अंक छ ।
