फेरि पछारियो मौरिन्होको योजना, लिभरपुल शीर्षमा, आर्सनल स्तव्ध
प्रकाशित २०७५ पुष २ सोमबार
279
Shares
काठमाडौं । इंगलिश प्रिमियर लिग फुटबलमा म्यान्चेस्टर युनाइटेड महत्वपूर्ण खेलमा परािजत भएको छ । जोजे मौरिन्होको युनाइटेड लिभरपुलसंग घुँडा टेकेको हो ।
लिभरपुलको एन्फिल्ड मैदानमा भएको खेलमा युनाइटेड ३–१ ले पराजित भयो ।
आइतबार राति भएको खेलमा लिभरपुलले युनाइटेडलाई हराएसंगै दोस्रो स्थानको म्यान्चेस्टर सिटीलाई १ अंकले पछि पार्दै शीर्ष स्थानमा पुग्न सफल भएको छ ।
लिभरपुलको महत्वपूर्ण जितमा जरदान शाकिरीको २ तथा सादियो मानेको एक गोल महत्पूर्ण रह्यो । युनाइटेडका जेसी लिङ्गार्डले एक गोल फर्काए ।
यससँगै लिभरपुलले प्रिमियर लिगमा आफ्नो अपराजित यात्रा कायमै राख्न सफल भएको छ । प्रिमियर लिगमा अपराजित रहने लिभरपुल एक्लो टोली हो ।
लिभरपुलले १७ खेलबाट ४५ अंक जोड्दा सिटीले समान खेलबाटै ४४ अंक जोड्यो । लिभरपुलसँगको हारसँगै युनाइटेड २६ अंक जोडेर छैटौं स्थानमा यथावत छ । युनाइटेड पाँचौ स्थानको आर्सनलभन्दा ८ अंकले पछि परेको छ ।
आर्सनल पनि आइतबार राति स्तव्ध भएको छ । आर्सनल साउथह्याम्पटनसंग ३–२ ले पराजित भयो । आर्सनललाई हराउँदै साउथह्याम्पटनले रेलिगेशन स्थानबाट सुधार गरेको छ ।
चेल्सी भने विजयी भयो । चेल्सीले ब्राइटन एन्ड होभ आल्बियनलाई २–१ ले हरायो । पेड्रो र एडन हजार्डले गोल गर्दै चेल्सीलाई उद्दार गरे ।
लिगमा टोटनह्याम ३९ अंकबाट तेस्रो तथा ३७ अंकबाट चेल्सी चौथो स्थानमा छ ।
