काठमाडौं । इङ्लिस प्रिमियर लिग फुटबलको यो सिजनको उपाधितर्फ लिभरपुल निकै अगाडि पुगेको छ । लिभरपुलको प्रतिस्पर्धामा रहेका क्लबहरु धेरै पछाडि परिसकेका छन् ।
दोस्रो स्थानको टिमसंग ९ अंकको अन्तर भइसकेको छ भने गोल अन्तर पनि निकै माथि छ ।
२० औं चरणको खेलमा शनिबार राति लिभरपुलले बलियो प्रतिद्धन्द्धी आर्सनलमाथि ५–१ गोल अन्तरले हराएर अझ बढी बलियो भएको दावेदारी प्रस्तुत गरेको छ ।
एन्फिल्डको घरेलु मैदानमा भएको खेलमा लिभरपुललाई जित दिलाउन रोबर्टो फर्मिनोले ह्याट्रिक गरे ।
उनको यो ह्याट्रिकलाई अन्तर्राष्ट्रिय मिडियाहरुले ‘वल्ड क्लास’ भनी नाम दिएका छन् ।
त्यसैगरी इजिप्सियन खेलाडी मोहोमद सालेह र सादियो मानेले एक–एक गोल थपे । आर्सनलका आइन्से मेटल्याण्ड नाइस्लले गोल गर्दै सुरुवाती लिड लिए पनि हारले भने त्यो गोल फितलो सावित भयो ।
जितसँगै लिरभपुलले अंक तालिकाको दोस्रो स्थानको टोटनह्याम हट्सपरसँग ९ अंकको अग्रता बनाउँदै ५४ अंक जोडेको छ ।
टोटनह्यामको ४५ अंक छ । शनिबार राति घरेलु मैदानमै टोटनह्याम पराजित भयो । उसलाई वुल्भरह्याम्पटन वान्डरर्सले ३–१ गोल अन्तरले हरायो । यो हारले टोटनह्यामको दोस्रो स्थान पनि खतरामा परेको छ ।
शनिबार रातिका अन्य खेलमा ब्राइटनले एभर्टनलाई १–० ले, फुल्हमले हडर्सफिल्डलाई १–० ले र कार्डिफले लेष्टर सिटीलाई १–० ले हरायो । वाट्फोर्ड र न्युकासल युनाईटेडले १–१ गोलको बराबरी खेले ।
