म्यान्चेस्टर युनाइटेडलाई मौरिन्हो नफापेको कि खेलाडीले गुटबन्दी गरेको ?
मौरिन्हो बाहिरिएपछि लगातार तीन खेलमा म्यान्चेस्टर युनाइटेडको फराकिलो जित
प्रकाशित २०७५ पुष १६ सोमबार
267
Shares
काठमाडौं । इंगलिश प्रिमियर लिग फुटबलमा नियमित प्रशिक्षक पोर्चुगिच ५५ वर्षीय जोजे मौरिन्होलाई निकालेपछि म्यान्चेस्टर युनाइटेडले निरन्तर आकर्षक प्रदर्शन गरेको छ । हरेक खेलमा युनाइटेडले फराकिलो जित निकाल्दै आएको छ ।
आइतबार रातिको खेलमा पनि युनाइटेडले एएफसी बर्नमाउथलाई ४–१ को गोल अन्तरले हरायो ।
युनाइटेडका लागि पउल पोग्वाले २ तथा मार्कस रासफोर्ड र रोमेलु लुकाकुले १–१ गोल गरे । बर्नमाउथका लागि नाथन एकेले सान्त्वना गोल फर्काए ।
मौरिन्हो गएपछि खेलाडीहरुले गरेको प्रदर्शनलाई लिएर मिलेमतोको आशंका समेत बढ्न गएको छ । मौरिन्हो र खेलाडीहरुबीच राम्रो सम्बन्ध नभएकैले उनीहरुले खेल हार्दै आएको अनुमान यसअघि नै हुँदै आएको थियो ।
खेलाडीहरुले मौरिन्हो रहेसम्म राम्रो नखेल्ने युनाइटेडको उच्चतहमा बताउँदै आएको समेत चर्चा चलेको थियो । मौरिन्हो गएपछि युनाइटेडको प्रदर्शन राम्रो हुँदा पनि यसलाई प्रमाणित गर्न सजिलो गर्छ ।
युनाइटेडमा जोजे मौरिन्हो बर्खास्तीपछि अन्तरिम प्रशिक्षक ओले गनर सोल्सजरको प्रशिक्षणमा युनाइटेडको यो लगातार तेस्रो जित हो । यसअघि युनाइटेडले कार्डिफमाथि ५–१ ले तथा हडर्सफिल्डमाथि ३–१ को जित निकालेको थियो ।
यो जितपछि युनाइटेड ३५ अंकसहित लिगको छैटौं स्थानमा छ ।
आइतबार रातिका अन्य खेलमा म्यान्चेस्टर सिटीले साउथह्याम्पटनलाई ३–१ ले हरायो । डेभिड सिल्भा, जेम्स वार्ड प्रोज र सर्जियो अगुएरोले १–१ गोल गरे ।
अर्को खेलमा चेल्सीले क्रिस्टल प्यालेसलाई १–० ले हरायो । एनगोलो काँटेले निर्णायक गोल गरे ।
त्यसैगरी बर्नलेले वेष्टह्यामलाई २–० ले हरायो ।
२० औं चरणको समाप्तिसम्म लिभरपुलको ५४, म्यान्चेस्टर सिटीको ४७, टोटनह्यामको ४५, चेल्सीको ४३ र आर्सनलको ३८ अंक छ ।
