काठमाडौं । बेलायती प्रधानमन्त्री टेरिजा मेविरुद्ध संसदमा ल्याइएको अविश्वास प्रस्ताव असफल भएको छ । विपक्षी लेबर पार्टीले प्रधानमन्त्री मे विरुद्ध अविश्वासको प्रस्ताव ल्याएको थियो ।

बुधबार राति भएको मतदानमा ३२५ सांसदले सरकारलाई साथ दिए भने ३०६ सांसदले अविश्वास प्रस्तावको पक्षमा मतदान गरेका थिए ।

प्रधानमन्त्री मेले केवल १९ मतको अन्तरले सरकारलाई बचाउन सफल भएकी हुन् । संसदले युरोपेली संघबाट ब्रिटेन अलग हुने प्रस्तावलाई बहुमतले अस्वीकृत गरेपछि विपक्षी लेबर पार्टीले प्रधानमन्त्री मे को सरकारले संसदमा विश्वास गुमाएको भन्दै प्रस्ताव दर्ता गराएको थियो ।

संसदमा निकै लामो समय छलफल
बुधबार रातिको संसदमा ६ घण्टाको छलफल भएको थियो । त्यसपछि मात्र मतदान भएको थियो । त्यो घडी निकै कठिन रुपले मेले गुजारेकी थिइन् । यो छलफलमा मेले धेरै कुराको सामना गर्नुपर्यो । 

उनले मात्र १९ मतले जितिन् । यसअघि ब्रेक्जिट प्रस्तावको विपक्षमा मतदान गरेका सत्तारुढ दलका सांसदले भने अविश्वासको प्रस्तावमा प्रधानमन्त्री मे कै पक्षमा मतदान गरेका थिए ।

के भनिन् विश्वासको मत पाएपछि मेले ? 
अविश्वास प्रस्ताव असफल भएसँगै संसदलाई सम्बोधन गर्दै प्रधानमन्त्री मेले युरोपेली संघ छोड्नको लागि भएको जनमत संग्रहको नतिजा पालना गराउन र जनतासँग गरेको वाचा पूरा गर्नका लागि आफुले काम गरिरहने बताएकी छिन् ।

उनले सबै राजनीतिक दलका नेताहरुसँग ब्रेक्जिटको आगामी बाटो बाहिल्याउन सहयोगका लागि अपिलसमेत गरिन् ।

सदनको पनि पर्याप्त समर्थन भएको र विचारयोग्य उपाय समाधान खोज्नुपर्ने उनको भनाइ छ । तर प्रतिपक्षी नेता जेरेमी कोर्बेनले कुनै पनि सकारात्मक बार्ता अघि प्रधानमन्त्री मे ले ब्रेक्जिटको संभावना खारेज गर्नुपर्ने बताएका छन् ।

सजिलो छैन अबको बाटो

संसदमा विश्वासको मत पाए पनि दुई वर्षभन्दा बढी समय लगाएर तयार पारेको ब्रेक्जित डिल अस्वीकृत हुनु प्रधानमन्त्री मेका लागि निकै ठूलो धक्का हो । उनले यो योजनामा मार्च २९ देखि २१ महिनाको अवधिमा बेलायत युरोपियन युनियन इयुबाट अलग हुने आधार तय गरेकी थिइन् ।

बेलायत मार्च २९ देखि इयुबाट बाहिरिँदै छ । तर ब्रेक्जिट डिल विफल भएपछि त्यसका आधारहरु के हुने भन्ने अन्यौल छ । अब प्रधानमन्त्री मे ले ब्रेक्जिटका लागि सहमतिका आधार खोज्न विशेष गरी लेबर पार्टीलाई मनाउनु पर्नेछ । 

तर विपक्षी दल मनाउन उनलाई सजिलो छैन । मंगलबार उनको नीति फ्लप भएपछि जब बुधबारसम्म उनले अविश्वासको प्रस्तावको सामना गर्नुपर्यो त्यो उनका लागि त घातक सिद्ध भयो विपक्षी दललाई समेत बलियो बनाएको छ । 

अब उनले विपक्षीका भनाइ पनि सम्वोधन गरेर अगाडि नबढ्ने हो भने यात्रा बीचमै पनि रोकिन सक्नेमा दुई मत छैन ।