- सुन चाँदी दर
- विनिमय दर
- नेपाली पात्रो
- राशिफल
काठमाडौं । ब्राजिलियन फुटबल स्टार नेयमारको आगामी खेल शंकाको घेरामा पुगेको छ । फ्रेन्च क्लब पिएसजीबाट खेल्दै आएका उनी बुधबार राति यसरी लडे जसले गर्दा उनका आगामी महत्वपूर्ण खेलहरुमा सहभागीता अन्योलमा रहेको छ ।
उनी बुधबार राति रुँदैरुँदै बाहिर निस्किए । फ्रेन्च कप अन्तर्गत स्ट्रासबर्गविरुद्धको खेलमा मैदानमा रहेका बेलामा उनी बाहिरिनु परेको हो । पिएसजीले खेल २–० ले जित्यो । एडिन्सन काभानी र एन्जल डी मारियाले गोल गरे ।
घरेलु मैदानमा भएको खेलमा नेयमारले राम्रो खेल कौशल प्रदर्शन गरे पनि गोल भने हुन सकेन । उनी दोस्रो हाफमा मैदानमा लडे । गोलीगाँठोमा गम्भीर चोट लागेपछि नेयमार ६० औँ मिनेटमा रुँदैरुँदै मैदानबाट बाहिरिए ।
च्याम्पियन्स लिग फुटबल अन्तर्गत प्रिक्वार्टरफाइनलको पहिलो लेगमा इंगलिश क्लब म्यानचेस्टर युनाइटेडसँग प्रतिस्पर्धा गर्नु तीन हप्ताअघि नेयमार चोटग्रस्त भएका हुन् ।
लिग वान लिडर पिएसजीका लागि नेयमारले यो सिजन अहिलेसम्म सबै प्रतियोगितामा गरेर २० गोल गरेका छन् ।
नेयमार अहिले अस्पतालमा छन् । उनको अवस्था कस्तो छ भन्ने बारे डाक्टरले गरेका परीक्षणपछि मात्रै थाहा हुने जनाइएको छ ।