- सुन चाँदी दर
- विनिमय दर
- नेपाली पात्रो
- राशिफल
काठमाडौं । इंगलिश प्रिमियर लिग क्लब चेल्सी इएफएल कप अर्थात् काराबाओ कप फुटबलको फाइनलमा पुगेको छ ।
लिग प्रतिद्वन्द्वी टोटनह्याम हट्सपरलाई पेनाल्टी सुटआउटमा पराजित गर्दै चेल्सी फाइनलमा प्रवेश गरेको हो ।
दोस्रो लेगमा चेल्सीले २–१ को जित निकाले पनि समग्रमा २–२ गोलको बराबरी भएपछि खेल पेनाल्टी सुटआउटमा पुगेको हो । पहिलो लेगमा चेल्सी १–० ले पराजित भएको थियो ।
घरेलु मैदान स्टामफोर्ड ब्रिजमा पेनाल्टी सुटआउटमा चेल्सीका विलियन, सेजर एज्पीलिक्वेटा, जर्गिन्हो र डेभिड लुइजले गोल गरे । टोटनह्यामका क्रिस्टियन इरिक्सन र इरिक लमेलाले मात्रै गोल गर्न सके ।
त्यसअघि घरेलु मैदानमा बिहीबार राति भएको खेलमा एङ्गोलो कान्टेको गोलबाट चेल्सीले खेलमा सुरुवाती अग्रता बनाएको थियो । ३८औं मिनेटमा इडेन हाजार्डले गोल गर्दै चेल्सीको अग्रता दोब्बर बनाए ।
५०औं मिनेटमा फर्नान्डो लोरेन्टेले गोल गर्दै खेललाई २–१ को स्थितिमा ल्याउदै खेललाई समग्रमा २–२ को बराबरीमा ल्याएका थिए । त्यसपछि थप गोल निस्कन नसक्दा चेल्सी विजयी भएपनि समग्रमा २(२ को बराबरी हुँदा खेल पेनाल्टी सुटआउटमा धकेलिएको थियो ।
अब चेल्सीले उपाधिका लागि म्यानचेस्टर सिटीसँग खेल्नेछ । सिटीले तेस्रो डिभिजनको क्लब बर्टन अल्वियोनलाई समग्रमा १०–० को जित निकाल्दै फाइनलमा स्थान बनाएको थियो ।
फाइनल खेल वेम्बली स्टेडियममा २४ फेब्रुअरीमा हुनेछ ।