प्रदेश २ को राजधानी जचुकालिमै रहन्छ : निधि

प्रकाशित मिति : २०७५ माघ १६ बुधबार

गौशाला ।  नेपाली कांग्रेसका उपसभापति एवं पूर्वगृहमन्त्री विमलेन्द्र निधिले प्रदेश नं २ को राजधानी जनकपुर र प्रदेश सरकारको भवन जनकपुर चुरोट कारखाना लिमिटेड (जचुकालि) मै रहने बताएका छन् ।

महोत्तरी जिल्लाको सदरमुकाम जलेश्वरस्थित कांग्रेस पार्टी कार्यालयमा बुधबार पत्रकार सम्मेलनमा नेका नेता निधिले जचुकालिको भवन प्रदेश सरकारका लागि उपयुक्त रहेकाले प्रदेश नं २ को राजधानी जनकपुर नै रहने ठोकुवा गरे।

उनले प्रदेश प्रमुखको कार्यालय र आवास, मुख्यमन्त्रीको कार्यालय र आवास, विभिन्न मन्त्रालय र मन्त्रीको आवास, सभा सम्मेलन गर्ने स्थानलगायतका पर्याप्त भौतिक संरचना रहेको जचुकालिको भवनले प्रदेश सरकारको कार्य सञ्चालनमा सहजता हुने बताए। साथै उनले प्रदेश नं २ को नाम मिथिला भोजपुरा राख्ने र पहिलो भाषा मैथिली तथा दोस्रो भाषा भोजपुरी राख्न सुझाव दिए ।

उनले प्रदेश नं २ को राजधानी जनकपुरबाट सार्ने उद्देश्यले नेपाल कम्युनिष्ट पार्टीका केही नेताले जचुकालि पुनः सञ्चालन गर्ने कुरा गरेर जचुकालिको सम्पत्ति भ्रष्टाचार गर्न तथा बेच्ने षड्यन्त्र गर्न लागिपरेको बताउदै कांग्रेसले त्यो कुनै पनि हालतमा हुन नदिने चेतावनी दिए। उनले त्यस्तो गर्न आउने नेकपाका नेतामाथि कांग्रेसका नेता कार्यकर्तालाई पहरेदारी गर्न सुझाव पनि दिए।

नयाँ