घाइते भए मेस्सी तर दुई गोल गरेर उद्दार गरे बार्सिलोनालाई
प्रकाशित २०७५ माघ २० आइतबार
97
Shares
काठमाडौं । स्पेनिश फुटबल क्लब बार्सिलोनाका कप्तान लियोनल मेस्सी घाइते भएका छन् । शनिबार राति भएको खेलमा भ्यालेन्सियासंग हार हुनबाट जोगाए पनि मेस्सी घाइते हुँदा भने एल क्लासिकोको मुख्य भिडन्तअघि नै धक्का लागेको छ ।
घरेलु मैदान नोउ क्याम्पमा भएको खेलमा सुरुको ३२ मिनेटभित्र बार्सिलोना २–० ले पछि परेको थियो । भ्रमण टोली भ्यालेन्सियाका लागि २४ औँ मिनेटमा केविन गामेइरो तथा ३२ औँ मिनेटमा पाएको पेनाल्टीमा ड्यानिएल पारेजोले गोल गरेका हुन् ।
३९ औँ मिनेटमा मेस्सीले पहिलो गोल गरेर अन्तर कम गरे । पहिलो हाफमा २–१ ले पछि परेको बार्सिलोनाले ६४ औँ मिनेटमा पेनाल्टी पायो ।
मेस्सीले पेनाल्टीमार्फत गोल गर्दै खेल बराबरीमा ल्याए । त्यसपछि दुवै तर्फबाट गोल हुन सकेन र बार्सिलोना हारबाट जोगियो ।
बराबरी गोल गरेको केही समयपछि नै मेस्सीको दायाँ थाइमा चोट लाग्यो ।
तर उनी आउँदो बुधबार कोपा डेल रे फुटबल अन्तर्गत रियाल मड्रिडसँग हुने सेमिफाइनलको पहिलो लेगका लागि फिट हुनेमा आशंका बाढेको छ ।
तर क्लबले उनी फिट हुने अपेक्षा गरेको छ ।
यो बराबरीपछि शीर्षस्थानको बार्सिलोनाको २२ खेलबाट ५० अंक भएको छ । दोस्रो स्थानमा रहेको एथ्लेटिको मड्रिडको २१ खेलबाट ४४ अंक छ र उसले आइतबार राति रियल बेटिससँग खेल्दैछ ।
