लिभरपुललाई पछि पार्दै म्यानचेस्टर सिटी अगाडि लाग्यो
प्रकाशित २०७५ माघ २४ बिहिबार
322
Shares
काठमाडौं । लिभरपुललाई पछि पार्दै म्यानचेस्टर सिटी इंगलिश प्रिमियर लिग फुटबलको शीर्षस्थानमा पुगेको । बुधबार राति भएको लिगको एकमात्र खेलमा म्यानचेस्टर सिटीले एभर्टनलाई २–० ले पराजित गर्दै शीर्ष स्थनमा फर्किएको हो ।
एक खेल बढी खेलेको सिटीले लिभरपुललाई गोल अन्तरमा पछि पारेको हो । सिटी र लिभरपुलको समान ६२ अंक छ ।
एभर्टनको मैदान गुडिसन पार्कमा भएको खेलमा सिटीलाई जिताउन एमेरिक लापोर्टे र गाब्रियल जिससले एक एक गोल गरे ।
प्रतिस्पर्धात्मक बनेको खेलमा सिटीले पहिलो हाफको इन्जुरी समयको थप गरिएको दोस्रो मिनेटमा लापोर्टेको गोलबाट अग्रता बनाएको थियो । लापोर्टेले डेभिड सिल्भाको पासमा गोल गरेका थिए ।
दोस्रो हाफमा पनि सिटीले इन्जुरी समयको थप गरिएको सातौं मिनेटमा गाब्रियल जिससले गोल गर्दै २–० को जित दिलाए । सिटीसँग पराजित एभर्टनको २६ खेलबाट ३३ अंक रहेको छ ।
दोस्रो स्थानमा झरेको लिभरपुलले शनिबार राति बर्नमाउथसँग खेल्नेछ । जितले पुनः ३ अंकको अग्रता तथा बराबरीले लिभरपुलले सिटीसँग एक अंकको अग्रता बनाउने छ । हारले भने लिभरपुल सिटीसँग गोल अन्तरमा पछि पर्नेछ ।
यो समीकरणले लिगको उपाधि भिडन्त रोचक बन्दै गएको छ । तेस्रो स्थानको टोटनह्यामको ५७ तथा चौथो स्थानको चेल्सीको ५० अंक छ ।
