काठमाडौँ । अन्तर्राष्टिय क्रिकेट काउन्सिल आइसिसी टी–२० महिला विश्वकप क्रिकेट अन्तर्गत एशिया क्षेत्र छनोटमा नेपाल अघिल्लो चरणमा पुग्ने आशाको त्यान्द्रो लिएर नेपाल मैदानमा उत्रिएको नेपालले कुवेतलाई ११७ रनको चुनौती दिएको छ ।
टस हारेर ब्याटिङ गरेको नेपालले ७ विकेटको नोक्सानीमा ११६ रन बनायो । विन्दु रावलले ४९ बलमा नटआउट २८ रन बनाइन् । कप्तान रुबिना क्षेत्रीले १३ बलमा २२ रन बनाइन् भने नेरी थापाले १९ बलमा १९ रन बनाइन् ।
जवाफमा कुवेत ब्याटिङमा उत्रेको छ । तेस्रो स्थानको नेपालका लागि पुछारको कमजोर कुवेतमाथि जित हासिल गर्नु सामान्य नै हो ।
तर थाइल्याण्डमा जारी उक्त छनोट प्रतियोगिताको विजेता टोलीमात्र अघिल्लो चरणमा पुग्ने भएकाले नेपालले आफूले जितेरमात्र पुग्नै छैन ।
प्रतियोगितामा पाँच खेल खेलेको नेपालले चार खेलमा जित तथा एउटा खेलमा हार ब्यहोर्दै आठ अङ्क जोडेर तालिकाको तेस्रो स्थानमा छ । आयोजक थाइल्याण्ड भने पाँचवटामै जित निकाल्दै १० अङ्कका साथ शीर्ष स्थानमा रहेको छ ।
नेपालका लागि थाइल्याण्डसँगको हार अघिल्लो चरण प्रवेशका लागि बाधक बन्ने देखिन्छ । ‘क्वालिफायर’मा युएईले पनि पाँच खेलमा चार खेल जित्दै आठ अङ्क जोडेको छ ।
नेपाल थाइल्याण्डसँग पराजित भएको थियो भने युएइ नेपालसँग पराजित भएको थियो । समान अङ्क भए पनि रनरेटको आधारमा युएई दोस्रो र नेपाल तेस्रो स्थानमा छन् ।
अब लिगको अन्तिम खेलमा थाइल्याण्ड र युएईबीच खेल हुनेछ । अब नेपाल छनोट हुने सम्भावना भनेको गणितीय हिसाबमा मात्र बाँकी छ ।
थाइल्याण्ड र युएईबीच हुने खेल युएईले झिनो अन्तरले जित्न सके र नेपालले कुवेतलाई फराकिलो अन्तरमा पराजित गर्नसके मात्र नेपाल अघिल्लो चरण पुग्नेछ ।
नेपालले कुवेतलाई फराकिलो अन्तरले पराजित गर्ने अनि थाइल्याण्डलाई पनि युएईले पराजित गरेमा तीन टोलीको समान १० अङ्क हुनेछ । यस्तो अवस्थामा राम्रो रनरेट हुने टोली पहिलो बन्दै टि–२० र ५० ओभर दुवैको ग्लोबल क्वालिफायरमा पुग्नेछ ।
यस्तो अवस्थामा नेपालले बुधबार हुने खेलमा कुवेतलाई फराकिलो अन्तरले हराउनेपर्ने हुन्छ भने थाइल्याण्डको हारको कामना पनि गर्नुपर्नेछ ।
छनोटमा नेपाल, थाइल्याण्ड, युएई, मलेशिया, कुवेत, चीन र हङकङले खेलिरहेका छन् । एशियाली राष्ट्रका लागि सन् २०२० मा हुने टि–२० विश्वकप र २०२१ मा हुने ५० ओभरको विश्वकपका लागि शुरुआती खुड्किलोको रूपमा रहेको यो प्रतियोगिता रहेको छ ।
