- सुन चाँदी दर
- विनिमय दर
- नेपाली पात्रो
- राशिफल
काठमाडौं । इंगलिश प्रिमियर लिग फुटबलमा लिभरपुलले बर्नलीलाई पराजित गरेपछि प्रिमियर लिगको उपाधि होड रोमाञ्चक बनेको छ । बर्नलीमाथि ४–२ को जितसँगै शीर्षस्थानको म्यानचेस्टर सिटीसँगको अंक दुरी १ मा झार्दै लिभरपुल उपाधि होडमा उभिएको हो ।
लिगका ८ खेल बाँकी रहँदा शीर्षस्थानको म्यानचेस्टर सिटीको ३० खेलबाट ७४ अंक रहेको छ । समान खेलबाट लिभरपुलको ७३ अंक रहेको छ ।
घरेलु मैदानमा लिभरपुलको जितमा सादियो माने र रोबर्टो फिर्मिनोले २–२ गोल गरे । बर्नलीका एस्ले वेस्टवुड र जोहान वर्ग गुडमुन्डसनले १–१ गोल गरे ।
खेलको छैटौं मिनेटमा एस्ले वेस्टवुडको गोलबाट पाहुना टोली बर्नलीले खेलमा अप्रत्यासित अग्रता बनाएको थियो ।
१९औं मिनेटमा लिभरपुलले बराबरी गोल फर्काउन सफल भयो । मोहम्मद सलाह र जर्जिन्हो विज्नल्डमको वान टु वान पासमा बर्नलीका गोलरक्षक झुक्किदा फिर्मिनोले गोल गरेका थिए ।
२९औं मिनेटमा मानेले भलीमार्फत सुन्दर गोल गरेपछि लिभरपुलले खेलमा २–१ को अग्रता बनायो ।
६९औं मिनेटमा बर्नलीका गोलरक्षक टोम हिटनको गल्तीमा फिर्मिनोले व्यक्तिगत दोस्रो तथा टिमका लागि तेस्रो गोल गरेपछि लिभरपुल ३–१ ले अघि बढ्यो ।
इन्जुरी समयको पहिलो मिनेटमा बर्नलीका जोहानले एक गोल गरेपछि खेल ३–२ को अवस्थानमा पुगेको थियो ।
तर, इन्जुरी समयको चौथो मिनेटमा मानेले गोल गर्दै लिभरपुललाई ४–२ को जित दिलाए ।
आर्सनल जित्यो म्यान्चेस्टर युनाइटेड हार्यो
आर्सनलले म्यानचेस्टर युनाइटेडलाई २–० ले पराजित गर्दै शीर्ष ४ होडलाई थप रोमान्चक बनाएको छ ।
यससँगै म्यानचेस्टर युनाइटेडका कार्यवाहक प्रशिक्षक ओले गुनार सोल्स्जरले प्रिमियर लिगमा पहिलो हार बेहोरेका छन् ।
स्विस मिडफिल्डर ग्रानिट झाकाले खेलको १२ औं मिनेटमा सुरुवाती अग्रता दिलाएका थिए ।
दोस्रो हाफमा फ्रेडले एलेक्जेन्डर लाकाजेटलाई पेनाल्टी क्षेत्रभित्र लडाएपछि प्राप्त पेनाल्टीमा पिएर एमेरिक औबामेयाङले गोल गर्दै जित पक्का गरे ।
यस नतिजाले शीर्ष ४ को प्रतिस्पर्धा भने थप रोमान्चक बनाएको छ । तेस्रो स्थानको टोटनह्याम हट्स्परले ३० खेलमा ६१ अंक जोडेको छ । चौथो स्थानको आर्सनलले ६०, म्यानचेस्टर युनाइटेडले ५८ तथा चेल्सीले २९ खेलमा ५७ अंक जोडेको छ ।
हारबाट जोगियो चेल्सी
चेल्सीले घरेलु मैदानमै उल्भरह्याम्पटनसंग १–१ को बराबरीमै चित्त बुझाउनु पर्यो ।
५६ मिनेटमा राउल जिमेनेजले गोल गर्दै उल्भरलाई अग्रता दिलाए । चेल्सीका एडन हजार्डले गोल गर्दै टोलीलाई हारबाट जोगाए ।