- सुन चाँदी दर
- विनिमय दर
- नेपाली पात्रो
- राशिफल
काठमाडौं । युरोकप फुटबल २०२० को छनोटमा ईटालीले सनसनीपूर्ण प्रदर्शन गरेको छ । इटालीले मंगलबार राति लेचटेन्सटेनमाथि आधा दर्जन गोल बर्सायो ।
पार्मामा भएको खेलमा १७ मिनेटमा स्टेफानो सेन्सीको गोलबाट अग्रता लिन थालेको इटालीले ३२ औं मिनेटमा मार्को भेर्राटीको गोलबाट दोब्बर पार्यो ।
३५ औं र ४५ औं मिनेटमा पाएको पेनाल्टीलाई फाबियो क्वाग्लिआरेलाले गोल गरेर ४–० गोलअन्तर पुर्याए ।
खराब खेलेको लेचटेन्सटेनका डानियल कौफमान रातो कार्ड खाएर मैदान बाहिर जाँदा लेचटेन्सटेन १० खेलाडीमा सीमित भयो ।
मोस केन र लियोनार्डो पाभोलेट्टीले एक गोल थपेर आधा दर्जन गोल पुर्याए ।
सन् २०१८ को रसिया विश्वकपमा छनोट हुन नसकेर आलोचित बनेको इटाली युरोकप छनोटमा भने आकर्षक प्रदर्शन गरिरहेको छ ।
समूह जेको इटालीले यसअघि फिनल्याण्डलाई २–० ले हराएको थियो । ६ टोली सहभागी समूह जेमा इटाली शीर्ष स्थानमा रहँदा ग्रीस र बोस्निया एण्ड हर्जगोबिना ४–४ अंकसहित दोस्रो र तेस्रो स्थानमा छन् ।
३ अंकको फिनल्याण्ड चौथो स्थानमा छ भने अर्मेनिया र लेचटेन्सटेनले खाता खोलेका छैनन् ।
दुई टोलीमात्र अर्को चरणमा पुग्नेछन् । मंगलबार रातिको खेलमा फिनल्याण्डले अर्मेनियालाई २–० ले हरायो भने ग्रीस र बोस्नियाले २–२ गोलको बराबरी खेले ।