चुनावको विरोध गर्दै आएका नक्सलवादीको हमलामा चार भारतीय सुरक्षाकर्मीको गयो ज्यान
स्थानीयलाई चुनावमा भाग नलिन धम्की
प्रकाशित २०७५ चैत २१ बिहिबार
493
Shares
काठमाडौं । भारतको छत्तीसगढमा नक्सलवादी आतंककारीको हमलामा परी भारतीय चार सुरक्षाकर्मीको ज्यान गएको छ ।
काँकरे जिल्लाको पंखाजूरमा बिहीबार नक्सलवादीले बिएसएफको सर्चिङ टिमलई छक्याएर हमला गरेको थियो ।
उक्त हमलामा परी दुई जना सुरक्षाकर्मी गम्भीर घाइते भएका छन् । नक्सल विरोधी अप्रेशनका लागि बिहीबार बिहान नक्सलवादीको लोकेशन फेला पारेपछि बीएसएफ–११४ बटालियन त्यसको खोजमा निस्केको थियो ।
पंखाजूरबाट करिब ३५ किलोमिटर टाढा प्रतापुर थाना क्षेत्रमा मोहलाको जंगलमा एकाएक सुरक्षाकर्मीमाथि आक्रमण भएको थियो ।
नक्सलवादीहरुले भारतको आसन्न लोकसभा निर्वाचन बहिस्कार गरेको छ । १८ अप्रिलमा दोस्रो चरणमा काँकरेमा मतदान हुँदैछ ।
उक्त ठाउँमा केही दिन पहिले नक्सलवादीले पर्चा छरेर चुनावको विरोध गरेका थिए । उनीहरुले स्थानीयलाई चुनावमा भाग नलिन धम्कीसमेत दिएका छन् ।
