काठमाडौं । भारतीय प्रधानमन्त्री एवं भारतीय जनता पार्टीका नेता नरेन्द्र मोदीलाई सबैभन्दा ठूलो सम्मानबाट सम्मानित गरिने भएको छ ।
संयुक्त अरब इमाइरेट्स युएईका राष्ट्रपति शेख खलिफा बिन जायेद अल नहयनले मोदीलाई युएईको सबैभन्दा ठूलो सम्मान जायद मेडलबाट सम्मानित गर्ने भएका हुन् ।
अबुधावीका युवराज तथा सेनाका डेपुटि सुप्रिम कमाण्डर शेख मोहम्मद बिन जायेदले ट्वीटरमार्फत यसबारेमा जानकारी दिएका हुन् ।
यो मेडल कुनै पनि देशका राष्ट्राध्यक्षले पाउने सबैभन्दा ठूलो सम्मान हो । मोदीले नहयनलाई धन्यवाद दिँदै यो सम्मानले दुई देशबीचको सम्बन्ध भविष्यमा थप मजबुद हुने बताएका छन् ।
मोदीलाई यो सम्मान दुई देशबीच मित्रता तथा कुटनीतिक सम्बन्ध मजबुद गरेबापत दिन लागिएको हो ।
मोदीलाई भन्दा पहिले युएईले चीनका राष्ट्रपति सी जिनपिङ, रुसका राष्ट्रपति भ्लादिमिर पुटिन, बेलायती महारानी एलिजाबेथ द्धितीया र साउदी अरबका राजा सलमानलाई यो मेडलबाट सम्मान गरिसकेको छ ।
भारतमा लोकसभा निर्वाचन हुँदै गर्दा मोदीले पाउने यो सम्मानबाट थप भोट मिल्ने आशा गरिएको छ ।
मोदीलाई यसअघि गत फेब्रुअरीमा दक्षिण कोरियाद्धारा सियोल शान्ति पुरस्कार मिलिसकेको छ । यो पुरस्कार पाउने मोदी १४ औं व्यक्ति थिए ।
