काठमाडौं । इंगलिश प्रिमियर लिग फुटबलमा लिभरपुल पुनः शीर्ष स्थानमा पुगेको छ । लिगको शुक्रबार रातिको खेलमा साउथह्याम्पटनलाई ३–१ ले पराजित गर्दै लिभरपुल अंक तालिकामा अगाडि लागेको हो ।
खेलको नवौं मिनेटमै शाने लोङको गोलमा साउथह्याम्पटनले अग्रता बनायो । यो उनको प्रिमियर लिगको ५० औं गोल थियो ।
बराबरी गोल गर्न लिभरपुललाई ३६ मिनेटको खेल कुर्नुपर्यो । नाबी केताले गोल गरेका हुन् ।
८० औं मिनेटमा मोहम्मद सलाहले गोल गर्दै टिमलाई अग्रता दिलाए । त्यसपछि भने खेल केही तनावपूर्ण भयो ।
गोल गरेको एक मिनेटमै सलाहले पहेंलो कार्ड पाए ।
८६ औं मिनेटमा जोर्डन हेन्डरसनले गोल गर्दै लिभरपुललाई ३–१ ले जिताए । ८९ औं मिनेटमा एन्डी रोबर्टसन तथा इन्जुरी समयमा जोर्डन हेन्डरसन र साडियो मानेले पहेंलो कार्ड खाए ।
३३ खेलबाट ८२ अंकको लिभरपुल शीर्ष स्थानमा छ । एक खेल कम खेलेको म्यान्चेस्टर सिटीको ८० अंक छ । तेस्रो स्थानको टोटनह्यामको ६४ अंक छ ।
सलाह कथा
सलाहले गत फेब्रुअरी ९ तारिखमा लिभरपुललाई गोल दिलाएपछि गोल गरेका थिएनन् । डेडलक शुक्रबार राति तोडे । त्यसपछि के चाहियो र उनले जर्सी नै फुकालिदिए ।
उनको गोलले टिमले २–१ को अग्रता बनाएको थियो । यो भाइटल गोलपछि खुशी हुनु स्वभाविक भए पनि जर्सी खेलेरै बढी खुशी मनाउन खोज्दा उनी पहेंलो कार्डको शिकार भए ।
