काठमाडौं । इंगलिश प्रिमियर लिग फुटबलमा पूर्व विजेता चेल्सी अंक तालिकाको शीर्ष चारमा पर्न सफल भएको छ ।
घरेलु मैदान स्टामफोर्ड ब्रिजमा सोमबार रातिको खेलमा कमजोर टिम बर्नलीसंग २–२ गोलको बराबरीमा चित्त बुझाए पनि शीर्ष चारमा पुग्न सफल भएको हो ।
खेलमा चेल्सी आठौं मिनेटमा पछाडि पर्यो । जेफ हेन्डरिकले गोल गर्दै बर्नलीलाई सुरुवाती अग्रता दिलाए । ईडेन हजार्डको पासलाई सदुपयोग गर्दै एन्गोलो कान्टेले १२ औं मिनेटमा चेल्सीलाई बराबरीमा ल्याए ।
त्यसको ६ मिनेटमै गोन्जालो हिग्विनले घरेलु टोलीलाई २–१ ले अग्रता दिलाए । तर २४ औं मिनेटमा एस्ले बार्नेसले गोल गर्दै खेल बराबरीमा ल्याए । बाँकी रहेको समयमा कुनै पनि टिमले गोल गरेनन् र खेल बराबरीमा टुंगियो ।
यो खेलपछि चौथो स्थानको चेल्सीले ३५ खेलबाट ६७ अंक जोड्यो । समान अंक भएपनि गोल अन्तरका आधारमा टोटनह्याम हट्सपर तेस्रो स्थानमा छ । आर्सनल ६६ अंकसहित पाँचौ स्थानमा झरेको छ ।
म्यान्चेस्टर युनाइटेड ६४ अंकसहित छैटौं स्थानमा छ । शीर्ष स्थानका लागि म्यान्चेस्टर सिटी र लिभरपुलबीच टक्कर छ । एक टिमको हारले उपाधि नै खोसिने पक्का छ ।
