काठमाडौं । भारतमा भइरहेको ईपीएल टी–२० क्रिकेटमा सन्दीप लामिछाने सम्मिलित दिल्ली क्यापिटल्स अंक तालिकाको दोस्रो स्थानमा झरेको छ ।
पहिलो पटक शीर्ष स्थानमा पुगेको दिल्लीलाई चेन्नाई सुपर किंगसले पछाडि धेकेलेको हो ।
मंगलबार राति भएको खेलमा चेन्नाईले सनराईजर्स हैदरावादलाई ६ विकेटले पराजित गर्दै शीर्ष स्थानमा उक्लिएको हो ।
चेन्नाईको घरेलु मैदानमा भएको खेलमा हैदरावादले दिएको १७६ रनको विजयी लक्ष्य चेन्नाईले १९.५ ओभरमा ४ विकेट गुमाएर पूरा गरेको हो ।
शेन वाट्सनले ९६ रन बनाए । उनले ५३ बलमा ९ चौका र ६ छक्का प्रहार गरे । यस्तै सुरेश रैनाले ३८ रन बनाए ।
हैदरावादका राशिद खान, भुवनेश्वर कुमार र सन्दीप शर्माले १–१ विकेट लिए ।
यसअघि टस हारेर पहिले ब्याटिङ गरेको हैदरावादले ३ विकेटको नोक्सानीमा १७५ रन बनाएको थियो ।
मनिस पाण्डेले नटआउट ८३ तथा डेभिड वार्नरले ५७ रन बनाए । हर्भजन सिंहले २ तथा दिपक चाहरले १ विकेट लिए ।
यो जितपछि चेन्नाईको ११ खेलबाट १६ अंक भएको छ । जितले डिफेन्डिङ च्याम्पियन चेन्नाई प्लेअफ नजिक पुगिसकेको छ । दिल्लीको ११ खेलबाट १४ अंक छ भने मुम्बई इन्डियन्सको १० खेलबाट १२ अंक छ ।
चौथो स्थानको हैदरावादको १० खेलबाट १० अंक छ भने समान खेलबाट किंगस ११ पंजाबको पनि १० अंक नै छ ।
बुधबारको खेल
बुधबार बैंगलरुमा रोयल च्यालेन्जर्स बैंगलोर र पंजाब खेल्नेछन् ।
जितले पंजाब प्लेअफका लागि अगाडि बढ्ने छ भने हारले यात्रा कठिन हुनेछ । हारले बैंगलोर प्लेअफ होडबाट बाहिरिने छ ।
