काठमाडौं । इंगलिश प्रिमियर क्लब लिभरपुल च्याम्पियन्स लिग फुटबलको फाइनलमा प्रवेश गरेको छ । सेमिफाइनलको दोस्रो लेगमा स्पेनिश क्लब बार्सिलोना विरुद्ध अविश्वसनीय पुनगरागमन गर्दै लिभरपुल फाइनलमा पुगेको हो ।
पहिलो लेगको खेल घरेलु मैदानमा बार्सिलोनाले ३–० गोल अन्तरले जितेको थियो । यो अवस्थामा लिभरपुल निकै दवावमा थियो घरेलु एन्फिल्डको मैदानमा मंगलबार राति ।
तर यति अविश्वसनीय खेल्यो कि दोस्रो लेगमा ४–० गोल अन्तरको जित निकाल्दै लिभरपुलले समग्रमा खेल ४–३ गोल अन्तरले जित्यो ।
घरेलु मैदान एनफिल्डमा लिभरपुल मुख्य फरवार्डद्वय रोबर्टो फिर्मिन्हो र मोहमद सलाहा बिना नै मैदान उत्रिएको थियो ।
दुई महत्वपूर्ण खेलाडी बिनाको लिभरपुलले कमाल देखाउने क्रममा डिभोक ओरिगी र जर्जिनियो वाइनाल्डमले समान २–२ गोल गरे ।
बार्सिलोनाका लागि यो निकै ठूलो झड्का हो । लिभरपुलले अब उपाधिका लागि जुन १ तारिखमा खेल्नेछ ।
दोस्रो सेमिफाइनल
दोस्रो सेमिफाइनलको दोस्रो लेगमा बुधबार राति इंगलिश क्लब टोटनह्याम हट्सपर र डच क्लब आयाक्स भिड्दै छन् ।
खेल आयाक्सको मैदानमा हुँदैछ । यसअघिको पहिलो लेगको खेलमा आयाक्सले टोटनह्यामलाई उसकै मैदानमा १–० गोल अन्तरले पराजित गरेको थियो ।
