सन्दीप लामिछानेलाई ७० हजार डलर 

प्रकाशित मिति : २०७६ जेठ ९ बिहिबार
तस्वीर –फाइल

काठमाडौं । नेपाली लेग स्पिनर सन्दीप लामिछाने वेष्ट इण्डिजको क्यारेबियन प्रिमियर लिग सीपीएल टी–२० क्रिकेटमा महंगोमा अनुबन्धित भएका छन् । 

गत सिजन झण्डै ६ लाख रुपैयाँ पाएका सन्दीपले यसपटक झण्डै ८० लाख रुपैयाँमा अनुबन्धित भएका हुन् । 

बेलायतको लण्डनमा भएको ड्राफ्टमा सन्दीपलाई बार्बाडस ट्राइडेन्टसले ७० हजार अमेरिकी डलरमा अनुबन्ध गरेको हो ।

उनलाई पाँचौ चरणमा छनोट गरिएको हो । गत सिजनको सीपीएल सेन्ट किट्स एन्ड नाभिस प्याट्रियट्सबाट खेलेका सन्दीपले ५ खेलबाट १०६ रन खर्चेर ७ विकेट लिएका थिए ।

बार्बाडसको प्रशिक्षकमा भारतीय प्रशिक्षक रोविन सिंह रहेका छन् । 

बिक्री भएनन् बाँकी तीन खेलाडी
सन्दीप नयाँ सिजनको लागि अनुबन्धित भएपनि ड्राफ्टमा समावेश भएका बाँकी नेपाली तीन खेलाडी भने बिक्री भएनन् ।

नेपालबाट तीब्र गतिका बलर सोमपाल कामी, अलराउण्डर दिपेन्द्र सिंह ऐरी र ब्याट्सम्यान रोहितकुमार पौडेल ड्राफ्टमा परेका थिए । १७ राउण्डसम्मको ड्राफ्टमा उनीहरु टिमको नजरमा नपरेका हुन् । 

यसपटक ५३६ खेलाडीहरु ड्राफ्टमा थिए । ६ टोलीले प्रतिस्पर्धा गर्ने सीपीएल जुलाई ११ देखि अगष्ट १६ ताखिखसम्म हुनेछ । 

नयाँ