-
-
-
-
काठमाडौं । इंगल्याण्डमा आयोजित आईसीसी एक दिवसीय विश्वकप क्रिकेटमा आयोजक टिमले दोस्रो जित हासिल गरेको छ ।
शनिबार राति भएको खेलमा बंगलादेशलाई १०६ रनको फराकिलो अन्तरले पराजित गर्दै इंगल्याण्डले दोस्रो जित निकालेको हो ।
कार्डिफमा इंगल्याण्डले अहिलेसम्मकै कीर्तिमानी ३८६ रन बनायो । जेसन रोयको बिस्फोटक ब्याटिङमा घरेलु टिमले ६ विकेटको नोक्सानीमा ३८६ रन बनाएको हो । ओपनर रोयले १५३ रनको शतकीय इनिङ्स खेले ।
रोयले पहिलो विकेटका लागि ओपनर जोनी ब्रेस्ट्रोसंग १ सय २८ रनको साझेदारी गरेका थिए । जोनीले ५१ रन बनाए । यस्तै जोस बट्लरले ६४ रन बनाए ।
बंगलादेशका मोहमद सइफुदिन र हसन मिराजले २–२ विकेट लिए । जवाफमा बंगलादेश ४८.५ ओभरमा अलआउट हुँदै २८० रन बनायो ।
बंगलादेशका लागि शकिब अल हसनले १२१ रनको सतक बनाए पनि टोलीलाई जित दिलाउन सकेनन् । यस्तै मुस्फिकर रहिमले ४४ रन जोडे ।
बंगलादेशलाई सस्तैमा समेट्न जोफ्रा आर्चर र बेन स्टोक्सले ३–३ विकेट लिए । मार्क उडको नाममा २ विकेट रह्यो ।
जितसंगै इंगल्याण्डले ३ खेलमा ४ अंक जोड्दै अंक तालिकाको दोस्रो स्थानमा रहेको छ । बंगलादेशको यो दोस्रो हार हो ।
