काठमाडौं । इंगल्याण्डमा जारी एक दिवसीय विश्वकप क्रिकेटमा पाकिस्तानले अफगानिस्तानमाथि महत्वपूर्ण जित हासिल गरेको छ ।
शनिबार राति भएको खेलमा पाकिस्तानले विश्वकपको कान्छो सदस्य अफगानिस्तानलाई ३ विकेटले पराजित गरेको हो ।
जितसंगै पाकिस्तानले शीर्ष चारमा रहँदै सेमिफाइनल पुग्ने सम्भावना बलियो बनाएको छ । पाकिस्तानले ८ खेलबाट ९ अंक जोडेको छ ।
अफगानिस्तानले अंक बटुल्न सकेको छैन ।
यस्तो छ खेलको अवस्था
लिड्समा भएको खेलमा अफगानिस्तानले दिएको २२८ रनको लक्ष्य पाकिस्तानले ४९.४ ओभरमा ७ विकेटको नोक्सानीमा पुरा गर्यो ।
इमाद वासिमले नटआउट रहँदै सर्वाधिक ४९ रन बनाए । यस्तै बाबर आजमले ४५ रन जोड्दा इमाम उल हकले ३६ रन बनाए । मोहम्मद नाबी र मुजिब उर रहमानले समान २–२ विकेट लिए ।
यसअघि टस जितेर पहिले ब्याटिङ गरेको अफगानिस्तानले निर्धारित ५० ओभरमा ९ विकेट गुमाउँदै २ सय २७ रन बनाएको थियो । नाजिबउल्ला जड्रान र अस्घर अफगानले समान ४२–४२ रन बनाए ।
शहिन शाह अफ्रिदीले ४ विकेट तथा वाहब रियाज र इमाद वासिमले समान २–२ विकेट लिए ।
