कोपा अमेरिका फुटबलको उपाधि जित्दै ब्रजिलले राख्यो यी कीर्तिमानहरु
प्रकाशित २०७६ असार २३ सोमबार
326
Shares
काठमाडौं । कोपा अमेरिका फुटबलको उपाधि ब्राजिलले जितेको छ । आइतबार राति ब्राजिलको माराकाना रंगशालामा भएको खेलमा पेरुलाई ३–१ गोल अन्तरले पराजित गर्दै ब्राजिलले उपाधि उचालेको हो ।
कोपा अमेरिकाको उपाधि जिताउन ग्याब्रियल जिससले नायकत्व प्रर्दशन गरे ।
उनले एक गोल गर्नुका साथै एक गोलको अवसर सिर्जना गरेका थिए ।
खेलको १५ औं मिनेटमा जिससको पासलाई सदुपयोग गर्दै सुसा सोरेसले घरेलु टोलीलाई सुरुवाती अग्रता दिलाएका थिए । पाओलो गुरेरोले ४४ औं मिनेटमा पेनाल्टीमा गोल गर्दै पेरुलाई खेलमा फर्काएका थिए ।
तर पहिलो हाफको इन्जुरी समयमा जिससले गोल गर्दै ब्राजिललाई २–१ को अन्तरमा ल्याए ।
७० औं मिनेटमा दोहोरो पहेलो कार्ड खाँदै जिससले मैदान छाडेपछि ब्राजिल १० खेलाडीमा सिमित बनेको थियो ।
खेलको अन्तिम मिनेटमा पेनाल्टीमा गोल गर्दै रिचर्डलिसनले ब्राजिलको जित सुनिश्चित गरेका थिए ।
के के कीर्तिमान बनायो ब्राजिलले ?
यो उपाधिसंगै सन् २००७ पछि पहिलो पटक घरेलु मैदानमा ब्राजिलले कोपा अमेरिकाको उपाधि उचाल्यो । ब्राजिलले नवौं पटक कोपा अमेरिकाको उपाधि उचाल्न सफल भएको छ ।
सन् २०१६ को ओलम्पिक खेलमा स्वर्ण जितेपछि ब्राजिलको यो पहिलो उपाधि हो ।
ब्राजिलले घरेलु मैदानमा आयोजित सबै संस्करणको कोपा अमेरिकाको उपाधि जित्ने कीर्तिमान समेत कायम राख्न सफल भएको छ ।
ब्राजिलले विश्वकप फुटबल पनि पाँच पटक जितिसकेको छ ।
