काठमाडौं । नेपालको यू–१९ क्रिकेट टिमले एउटा रेकर्ड बनाएको छ । त्यो हो मेडनको । नेपालले मलेसियामा जारी एसीसी यू–१९ इस्टर्न रिजन क्रिकेटको फाइनलमा हङकङ विरुद्ध उक्त मेडनको रेकर्ड बनाएको हो ।
हङकङलाई ४३.१ ओभरमा अलआउट गरेका नेपाली बलरहरुले केवल ९५ रनमात्र दिए ।
त्यतिमात्र हैन १५ ओभर मेडन ओभर गरेका थिए । सबैभन्दा बढी विकेट लिने सागर ढकालले ५ मेडन राखेर ५ विकेट लिए ।
उनले १० ओभरमा ५ मेडन राखेर १८ रन खर्चेर ५ विकेट लिएका हुन् ।
त्यस्तै कुशल मल्लले पनि ५ मेडन राखे । उनले ८.१ ओभर बलिङ गर्दै ४ रन खर्चेर १ विकेट लिएका थिए ।
कमल सिंह ऐरीले ८ ओभरमा २ मेडन राख्दै २३ रन खर्चेर ३ विकेट लिएका थिए ।
रसिद खानले ७ ओभर बलिङ गर्दै १ मेडन राखेर १८ रन दिए । त्यस्तै पवन सर्राफले ६ ओभरमा १ मेडन राखेर १९ रन दिएका थिए ।
तिलकराम भण्डारीले ४ ओभरमा १ मेडन राख्दै १२ रन खर्चेर १ विकेट लिएका थिए ।
उपाधि रक्षाका लागि अहिले हङकङसंग खेलिरहेको नेपालले मात्र ९६ रनको लक्ष्य पछ्याइरहेको छ ।
किन्रारा ओभलमा भइरहेको खेलमा नेपालले टस जितेर पहिले बलिङ गरेपछि हङकङ सस्तैमा आउट भयो । नेपालले निकै सशक्त बलिङ गरेपछि हङकङ ४३.१ ओभरमा अलआउट भएर ९५ रन मात्र बनाउन सक्यो ।
सागर ढकाललाई ५ विकेट र कमल सिंह ऐरीले ३ तथा कुशल मल्ल र तिलकराज भण्डारीले १–१ विकेट लिए । हङकङका तीन खेलाडीले मात्र दोहोरो स्कोर खडा गरेकामा अदित गोरावाराले २४ रन बनाएका थिए ।
हङकङले सेमिफाइनलमा सिंगापुरलाई डीएल म्याथड अनुसार वर्षाले खेल रोकिँदा ५१ रनको जित पाएको थियो ।
समूह चरणमा अपराजित रहँदै नेपाल समूह विजेता बनेको थियो । पहिलो खेलमा चीनलाई १० विकेटले हराएको नेपालले दोस्रो खेलमा सिंगापुरलाई २१७ रनको फराकिलो अन्तरले पराजित गरेको थियो ।
