-
-
-
-
काठमाडौं । अष्ट्रेलिया विरुद्धको तेस्रो टेष्ट क्रिकेटमा इंगल्याण्डले सनसनीपूर्ण जित निकाल्न सफल भएको छ ।
लिड्समा भएको खेलमा ३५९ रनको विजयी लक्ष्य पछ्याएको इंगल्याण्डले ९ विकेटको नोक्सानीमा पुरा गर्यो ।
कुनै समय २८६ रन बनाउँदा ९ विकेट गुमाइसकेको इंगल्याण्डले दशौं विकेटका लागि ज्याक लिचले १७ बल खेल्दै नटआउट १ रन बनाउँदै बेन स्टोक्सलाई साथ दिए ।
स्टोक्सले २१९ बलमा ८ छक्का र ११ चौकाको मद्धतमा नटआउट रहँदै १३५ रन बनाए ।
कुनै समय जित नजिक पुगिसकेको इंगल्याण्डले निरन्तर विकेट गुमाएपछि हार निश्चित जस्तै बनेको थियो ।
इंगल्याण्डको जितको इनिङमा कप्तान जो रुटले ७७ र जो जेन्लीले ५० रन बनाए । जोस हाज्लेवुडले ४ विकेट लिए ।
पहिलो इनिङमा ६७ रनमै अलआउट भएको इंगल्याण्डले खेल जितेर क्रिकेटमा जस्तो पनि परिणाम आउन सक्ने आंकलनलाई थप पुष्टि गरेको छ ।
यसअघि अष्ट्रेलियाले पहिलो इनिङमा १७९ र दोस्रो इनिङमा २४६ रन बनाएर इंगल्याण्डलाई ३५९ रनको लक्ष्य दिएको थियो ।
यो खेलपछि पाँच खेलको एसेज सिरिजमा १–१ को बराबरी भएको छ । पहिलो खेल अष्ट्रेलियाले जितेको थियो भने दोस्रो खेल बराबरीमा सकिएको थियो ।
