न्युजिल्याण्डलाई श्रीलंकाले हराउँदा मालिंगाले राखे थुप्रै कीर्तिमान, चार बलमा चार विकेट
प्रकाशित २०७६ भदौ २१ शनिबार
435
Shares
काठमाडौं । श्रीलंकन बलर लासिथ मालिंगाले कीर्तिमानी प्रदर्शन गरेपछि श्रीलंकाले न्युजिल्याण्डलाई तेस्रो तथा अन्तिम टी–२० क्रिकेटमा ३७ रनले हराएको छ ।
खेलमा श्रीलंकाले २० ओभरमा ८ विकेटको नोक्सानीमा १२५ रन बनाएको थियो । श्रीलंकाका लागि दनुशा गुनाथिलाकाले ३० तथा निरोशन डीक्वेलाले २४ रन बनाएका थिए ।
शुक्रबार राति पाल्लेकेलेको घरेलु मैदानमा श्रीलंकाले दिएको १२६ रनको लक्ष्य पछ्याएको न्युजिल्याण्ड १६ ओभरमा ८८ रन जोड्दा अलआउट भएको थियो ।
कप्तान टिम साउथीले नटआउट २८ रन जोडे । ४ खेलाडीले खाता खोल्न सकेनन् ।
मालिंगाले ह्याट्रिकसहित ५ विकेट लिए । उनले तेस्रो ओभरको चार बलमा लगातार ४ विकेट लिँदै ह्याट्रिक पुरा गरेका थिए ।
उनले दोस्रो पटक ४ बलमा ४ विकेट लिएका हुन् । योसँगै मालिंगा टी–२० मा दुई पटक ४ बलमा ४ विकेट लिने खोलाडी बनेका हुन् । दोस्रो पटक ह्याट्रिक लिने खेलाडीको कीर्तिमान पनि मालिंगाको नाममा रहेको छ ।
उनले टी–२० मा १०० विकेट लिने पहिलो खेलाडीको नामसमेत आफ्नो नाममा लेखाएका छन् ।
मालिंगाले अन्तराष्ट्रिय क्रिकेटमा पाँच ह्याट्रिक विकेट लिने पहिलो खेलाडीको कीर्तिमान पनि बनाएका छन् ।
यो शानदार जितले पनि श्रीलंकाले सिरिज भने जोगाउन सकेन । यसअघिका दुवै खेल जितेको न्युजिल्याण्डले सिरिज २–१ ले जितेको छ ।
