काठमाडौं । १३ औं दक्षिण एसियाली खेलकुद प्रतियोगिता साग समापनतिर गएको छ । मंगलबार अन्तिम दिन विभिन्न ५ खेलमा प्रतिस्पर्धा हुँदैछ ।
पोखरा र जनकपुरले सागका खेलहरु सकिसकेको अवस्थामा अब बाँकी सबै खेल काठमाडौंमा हुँदैछन् । त्योसंगै समापन पनि काठमाडौंमै हुँदैछ ।
सागमा मंगलबार फुटबल, बक्सिङ, बास्केटबल, जुडो र स्क्वासको प्रतिस्पर्धा हुनेछ ।
–पुरुष फुटबलको स्वर्ण पदकको लागि नेपाल र भुटानबीच खेल हुनेछ । त्रिपुरेश्वरस्थित दशरथ रंगशालामा नेपाल र भुटानबीचको फाइनल खेल दिउँसो ३ बजे हुनेछ ।
–पुरुष बास्केटबलको फाइनल त्रिपुरेश्वरस्थित कभर्ड हलमा भारत र श्रीलंकाबीच दिउँसो १ बजे हुनेछ । महिला बास्केटबलमा नेपाल र भारतबीचको फाइनल खेल दिउँसो ३ः३० बजे सुरु हुनेछ । त्यसअघि महिला बास्केटबलमा भुटान र माल्दिभ्सबीच तथा पुरुष बास्केटबलतर्फ नेपाल र बंगलादेशको तेश्रो स्थानको खेल हुनेछ ।
–बक्सिङमा अन्तिम दिन ८ स्वर्णका लागि प्रतिस्पर्धा हुनेछ । फाइनल खेल दिउँसो १ बजेदेखि सुरु हुनेछ । नेपालले ५ स्पर्धामा फाइनल खेल्नेछ ।
–जुडोमा मंगलबार १ स्वर्णका लागि प्रतिस्पर्धा हुनेछ । आर्मी शारीरिक तालिम तथा खेलकुद केन्द्र लगनखेलमा बिहान ९ बजेदेखि सुरु हुने खेलको फाइनल दिउँसो १२ः३० मा सुरु हुनेछ ।
–स्क्वासको टिम स्पर्धाको फाइनल खेलमा पाकिस्तान र भारतले महिला र पुरुष दुवै टिम स्पर्धामा प्रतिस्पर्धा गर्ने छन् । पुरुषतर्फ कांस्य पदकका लागि नेपाल र बंगलादेशले प्रतिस्पर्धा गर्नेछ । महिलातर्फ नेपाल र श्रीलंका कास्यको लागि खेल्नेछन् ।
