काठमाडौँ। अमेरिकन क्यानोनियरीङ एकेडेमीका वरिष्ठ प्रशिक्षक रीच कार्लसनको नेतृत्वमा आएको एकेडेमीको टोलीका सदस्यले नुवाकोट जिल्लाको ककनी गाउँ विकास समिति हिलेगाउँमा भूकम्पपीडित परिवारका लागि अस्थायी घर निर्माण गरेका छन् ।
एरिजोना, युटाहसहित अमेरीकाका विभिन्न ठाउँका साहसिक खेल क्यानोनिङ गर्न रुचाउने दश जनाले बाँस, टीन र काठका नौवटा अस्थायी घर निर्माणमा स्वेच्छिक श्रमदान गरेका थिए । उनीहरुले केही रकम, लुगा र उपयोगी सामग्री गाउँलेलाई प्रदान गरे ।
फ्रेन्ड्स एडभेन्चर टीम प्रालिका प्रवन्ध निर्देशक राजेन्द्रबहादुर लामा, हिमालयन म्याप हाउसका निर्देशक पवन शाक्य, सुखवती फाउण्डेशनका उपाध्यक्ष चीजमान गुरुङ्ग र शैलेन्द्र कार्कीले विदेशी साथीको सहयोगमा ककनी गाउँक्षेत्रमा सयभन्दा बढी अस्थायी घर निर्माणमा सहयोग जुटाउने क्रममा एकेडेमीका सदस्य हिलेमा पुगेका हुन् ।
एरीजोना युटाहका किम र मार्क फास्टर दम्पतीले भूकम्पपीडितलाई दुर्गम गाउँमै पुगेर मानिसलाई अति आवश्यक पर्ने घर बनाउन स्वेच्छिक श्रमदान गर्न पाउँदा निकै खुशी लागेको बताउनुभयो ।
सन् २००८ देखि नेपालमा क्यानोनिङ खेलको प्रशिक्षण दिदै आएका रीच कार्लसनले सोही क्षेत्रमा एक विद्यालय पुनःनिर्माणमा श्रम गर्ने चाहना भएपनि तिहारको कारण रोकिएकोले आगामी दिनमा थप सहयोग गर्ने बताउनुभयो ।
उहाँले भूकम्पपीडितलाई विभिन्नसमयमा चार हजार डलर नगद सहयोग पठाएको बताउनुभयो ।
हाल दोहाको कतारमा रहनुभएकी अमेरिकाकी शेरी केन्लीले आफ्ना धेरै नेपाली साथी भएकाले नेपालीलाई सकेको सहयोग गर्ने इच्छाअनुरुप स्थानीय गोर्वासी निम्न माध्यमिक विद्यालयका १७३ विद्यार्थीलाई जुत्ता, पाठ्यसामग्री र खेलकुदका सामग्री प्रदान गरेको बताउनुभयो । रासस
