बेलायतको बेरोजगार दर सन् १९७४ पछि कै निम्न अवस्थामा
एपी,
प्रकाशित २०७६ पुष २ बुधबार
883
Shares
लण्डन। बेलायतको बेरोजगार दर सन् २०१९ को पछिल्लो त्रैमासिक (अगष्ट–अक्टोबर) मा सन् १९७४ पछिकै निम्न विन्दुमा झरेको राष्ट्रिय तथ्याङ्क कार्यालय (ओएनएस) ले मङ्गलबार सार्वजनिक गरेको तथ्याङ्कमा उल्लेख छ।
तथ्याङक अनुसार बेलायतमा करिब १२ लाख ८० हजार व्यक्ति बेरोजगार रहेका छन्। सन् २०१८ को सोही अवधिको तुलनामा यो सङ्ख्या ९३ हजारले कमी हो भने पाँच वर्ष पहिलेको सोही अवधिभन्दा यो सङ्ख्या छ लाख ७३ हजारले कमी हो। “विगत छ वर्षमा बेलायतको बेरोजगार दर सामान्य गतिमा घटिरहेको छ,” तथ्याङ्क कार्यालयले जनाएको छ।
यसैबीच बेलायतमा रोजगार दर ७६.२ प्रतिशत रहेको पनि अध्ययनले बताएको छ। यो दर गत वर्षको अगस्ट–अक्टोबरको तुलनामा ०.४ प्रतिशत अङ्कले वृद्धि हो। बेलायतमा ८०.४ प्रतिशत पुरूष रोजगार रहेका छन् भने महिलाको रोजगार दर ७२.० प्रतिशत देखिएको छ।
पछिल्लो समय महिलाहरूको रोजगार दरमा देखिएको वृद्धिमा आंशिक रूपमा राज्यले महिलाका लागि सेवा निवृत्त हुने उमेर हदलाई बढाउनु पनि जिम्मेवार रहेको उल्लेख गरिएको छ। बेलायतमा महिलाहरूले सक्रिय जागिरे जीवनबाट ६० देखि ६५ वर्षको उमेरमा विदा लिने गरेका तथ्याङ्कमा उल्लेख छ।
