खस्यौली । रुपन्देहीको कञ्चन गाउँपालिकाको वडा नं १ मा एकै घरका चार सहित २३ जनामा मंगलबार कोरोना संक्रमण भएको छ । भैरहवास्थित प्रादेशिक अस्पतालमा उनीहरुको स्वाब परीक्षणमा कोरोना पोजेटिभ देखिएको कञ्चन गाउँपालिकाका अध्यक्ष गोकर्णबहादुर क्षेत्रीले जानकारी दिए ।
भारतबाट आएर होम क्वारेन्टाइनमा बसेका एकै घर परिवारमा ४ र ९ वर्षका बालक समेत रहेको उनले बताए । सो गाउँपालिकाको वाड नं १, ३, ४ र ५ मा होम क्वारेन्टाइनमा बसेकामा कोरोना संक्रमण देखिएको छ ।
कोरोना संक्रमित सो उमेर समूह बाहेक १८ देखि ४५ वर्षसम्मका छन । संक्रमणसँगै गाउँपालिकाको वडा नं १ स्थित लौसा लगायतका क्षेत्र बन्द गरिएको कञ्चन गाउँपालिकाले जनाएको छ ।
अध्यक्ष क्षेत्रीले इजाजतप्राप्त बाहेक अन्य सवारी साधन र मानिसलाई हिडडुलमा रोक लगाइएको बताए । जिल्ला स्वास्थ्य कार्यालय, रुपन्देहीका प्रमुख राजेन्द्र गिरीका अनुसार मंगलबार मात्रै ५४ जना कोरोना संक्रमित थप भएका छन ।
योसँगै कोरोना संक्रमितको सङ्ख्या जिल्लामा ७२८ पुगेको छ । जिल्लामा ३४५ निको भएर घर फर्केका छन ।
