मेगा बैङ्कको एकै दिन ६ वटा नयाँ शाखा विस्तार, थप १० वटा शाखाहरू विस्तारको क्रममा

मेगा बैङ्कको एकै दिन ६ वटा नयाँ शाखा विस्तार, थप १० वटा शाखाहरू विस्तारको क्रममा

हाम्रा कुरा

प्रकाशित २०७८ साउन १६ शनिबार

काठमाडौँ। मेगा बैङ्क नेपाल लिमिटेडले शुक्रवार एकै दिन ६ वटा नयाँ शाखा विस्तार गरेको छ। बैङ्कले प्रदेश नम्बर १ मा एउटा, बागमती प्रदेशमा ३ वटा, लुम्बिनी प्रदेशमा एउटा र सुदूरपश्चिम प्रदेशमा एउटा गरी जम्मा ६ वटा नयाँ शाखाहरू विस्तार गरेको हो।

प्रदेश नम्बर १ मा सुनसरी जिल्लाको इटहरी उपमहानगरपालिका वडा नम्बर १६ स्थित लविपुरमा बैङ्कले नयाँ शाखा खोलेको छ। बागमती प्रदेशमा नुवाकोट जिल्लाको विदुर नगरपालिका वडा नम्बर २ बट्टारमा, चितवन जिल्लाको भरतपुर महानगरपालिका वडा नम्बर ७ विकास चोकमा र सोही महानगरपालिकाको वडा नम्बर १० भरतपुर हाइटमा पनि बैङ्कले नयाँ शाखाहरू सञ्चालनमा ल्याएको छ।

त्यसै गरी लुम्बिनी प्रदेशमा बाँके जिल्लाको नेपालगन्ज उपमहानगरपालिका वडा नम्बर १८ कारकाँदोमा र सुदूरपश्चिम प्रदेशमा कैलाली जिल्लाको धनगढी उपमहानगरपालिका वडा नम्बर १ एलएन चोकमा पनि नयाँ शाखा विस्तार गरेको बैङ्कले जनाएको छ। यी शाखाहरूबाट बैङ्किङ कारोबारको प्रारम्भ शुक्रवारबाटै भएको बैङ्कका प्रमुख सूचना अधिकारी तुलसीराम पोखरेलले जानकारी दिए।