काठमाडौं । प्रधानमन्त्री शेरबहादुर देउवा र प्रमुख प्रतिपक्षी दल एमाले अध्यक्ष केपी ओलीबीचको भेटवार्ता सकिएको छ । नयाँ बानेश्वरस्थित संसद भवनमा दुई शीर्ष नेताबीच एमसीसीसहित संसदको गतिरोध अन्त्य गर्ने विषयमा छलफल भएको छ ।
‘प्रधानमन्त्री देउवा र एमाले अध्यक्ष ओलीबीच एमसीसीसहितको विषयमा छलफल भएको छ,’ प्रधानमन्त्रीका प्रेस सल्लाहकार गोविन्न परियारले भने ।
दुई शीर्ष नेताबीचको भेटवार्तामा सञ्चार तथा सूचना प्रविधिमन्त्री ज्ञानेन्द्रबहादुर कार्की, कांग्रेस महामन्त्री गगनकुमार थापा, एमाले संसदीय दलका उपनेता सुवास नेम्वाङ र वरिष्ठ उपाध्यक्ष ईश्वर पोखरेल सहभागी थिए ।
एमसीसीमाथि छलफल गर्नेगरी बिहीबारका लागि बोलाइएको प्रतिनिधिसभा बैठक शुक्रबार दिउँसो १ बजेसम्मका लागि स्थगित भएपछि कांग्रेस र एमालेका शीर्ष नेताबीच भेटवार्ता भएको हो ।
एमसीसी पारित गर्नका लागि सरकारले नैतिक जिम्मेवारी बहन गरिरहेको छ । सत्तागठबन्धनमा रहेका नेकपा माओवादी केन्द्र र नेकपा एकीकृत समाजवादी गैरजिम्मेवार बन्दै सडक संघर्ष गर्नेतर्फ लागेपछि नेपाली कांग्रेसले प्रमुख प्रतिपक्ष एमालेसँग सहकार्य गर्न खोजेको हो ।
एमाले पनि एमसीसी पारित गर्न राजी देखिएको छ । संसदमा आफूहरुको माग पूरा भए एमसीसी पारित गर्न सघाउने एमालेले बताइसकेको छ ।
नयाँ कोर्सका लागि देउवा र ओलीबीच वार्ता भइरहँदा अब ‘एक्सन’ जानुपर्ने बेला आएको समेत बताइन्छ ।
