हेटौँडा । नेपाली कांग्रेस मकवानपुरको अधिवेशन अन्तर्गत आज हुने भनिएको मतदान अझै शुरु भएको छैन ।
बिहान ८ बजेदेखि मतदान शुरु हुने तालिका थियो । तर कारणवश मतदान १० बजेदेखि सुरु हुने जिल्ला निर्वाचन अधिकृत गोपी शर्मा सुवेदीले बताएका थिए । १० बजेदेखि शुरु हुने निर्वाचन पनि अझै सुरु हुन सकेको छैन ।
आइतबारदेखि सुरु भएको कांग्रेस मकवानपुरको अधिवेशन हेटौँडा उपमहानगरपालिका वडा नम्बर १ डल्फिन चौरमा हुँदै छ ।
आज सोमबार हुने चुनावमा एक सभापति पदका लागि ३ जना, २ जना उपसभापति पदका लागि ७ जना, २ जना सचिव पदका लागि ६ जना र २ जना सहसचिव पदका लागि ७ जनाको उम्मेदवारी परेको छ ।
सभापति पदमा हालका सचिव बुद्ध लामा, हेटौँडा उपमहानगरपालिकाका निवर्तमान सभापति आनन्दराम पराजुली र जयराम लामिछानेले उम्मेदवारी दिएका छन् ।
उम्मेदवारी दिनेमा लामा र पराजुली संस्थापन पक्ष निकट हुन् भने लामिछाने संस्थापन इतर पक्षका हुन् ।
आज हुने मतदानमा मकवानपुरका १०२ वटा वडा सभापति, क्षेत्रीय सभापति एवम् प्रतिनिधि र बुथ प्रतिनिधि गरी करिब १ हजार ९ सय जना मतदाता सहभागी हुनेछन् ।
