रुपन्देही । वार्षिक करिब ३६ लाख रुपैयाँ आम्दानी हुने अपेक्षाका साथ निर्माण गरिएको “तिलोत्तमा भ्यु टावर” हेर्दा चिटिक्ट पारिएको छ । जो कोहीलाई पनि बाहिरबाट देख्दा टावरमा चढेर दृश्यावलोकन गर्ने हुटहुटी नै जाग्छ ।

तिलोत्तमा नगरपालिका वडा न–१ शंकरनगरस्थित वनवाटिकामा निर्मित तिलोत्तमा बहुउद्देश्यीय भ्यु टावरको उद्घाटन एक वर्ष अगाडि गरिसकिएको छ ।

सो क्रममा तिलोत्तमा नगरपालिकाका तत्कालीन नगरप्रमुख वासुदेव घिमिरेले बर्सेनि ३६ लाख रुपैयाँ आम्दानी दिने दाबी गरे । तर सोही भ्यु टावरको उद्घाटन भएको झण्डै एक वर्ष पुगिसक्दासमेत सञ्चालनमा आउन सकेको छैन । तत्कालीन मेयर हालका संघीय सांसद घिमिरेले दाबी गरेको भनाइअनुसार नगरपालिकाले ३६ लाख रुपैयाँ गुमाइसकेको छ ।

बर्सेनि लाखौं रुपैयाँ आम्दानी गुम्दै जाने योजनामा सरकारले हचुवाको भरमा बनाएको योजनाको हतारमा गरिएको उद्घाटन फगत बन्न पुगेको वनबाटिकामा घुम्न आएका बुटवलका निशान मगरले बताए ।

उनले भौतिक संरचना त ठड्याइएको तर त्यसबाट कसरी आम्दानी गर्न सकिन्छ भन्ने कार्यविधि स्पष्ट रुपमा पूर्वनिर्धारित नगर्नाले अहिले निर्माण भइसक्दासमेत प्रयोगविहीन हुँदा पर्यटकहरु निराश हुन परेको जनाए । उनले आफू भ्यु टावर बनेको छ रे भनेर त्यहाँबाट दृश्य अवलोकन गरेर मनोरञ्जन गर्ने भनेर आएको तर सोचे जस्तो यहाँ तयार भएको रहेनछ भने ।

स्थानीय पालिका तथा शंकरनगर बनविहार तथा अनुसन्धान केन्द्र वनबाटिकाले गरेको करोडौं लगानीको प्रतिफल पाउने आश कागलाई बेल पाक्यो हर्ष न विष्माद् जस्तै बन्न पुगेको छ ।

२०७४ साल चैत १५ गते शिलान्यास भएको भ्यु टावरको उद्घाटन ०७८ साल चैत १५ गते उद्घाटन गरिएको थियो । नगरपालिकाले आन्तरिक आम्दानीको स्रोतका लागि अपेक्षित गर्दै ११ तला भ्यू टावर निर्माणमा रकम खर्चिएको भए पनि शुरु गरेर आम्दानी लिन भने सकिरहेको छैन । 

कुल ११ करोड ५४ लाख ८१ हजार रुपैयाँको लागतमा निर्माण गरिएको भ्यु टावर १३४ फिट उचाइ रहेको छ । १२ जना अट्ने क्षमतासहितको लिफ्ट जडान गरिएको छ । उक्त भ्यु टावर सञ्चालनको जिम्मा अनुपम निर्माण सेवाले पाएको छ ।

१० वर्षका लागि लिजमा सञ्चालन सम्झौता गरेको पाइएको छ । सञ्चालन ठेक्का पाएका निर्माण सेवाका सञ्चालक टोपबहादुर रायमाझीले भवन निर्माण पूर्णरुपमा सकिएको तर बगैंचालगायत संरचनाको काम निर्माण कम्पनी ठेकेदारले सम्पन्न नगरेकाले सञ्चालनमा ढिलाइ भएको बताए । 

२५ हजार १ सय २२ वर्गफिट क्षेत्रफलमा फैलिएको छ । भुइँतला ३ हजार ५ सय ९५ वर्गफिटमा छ । ८ वटा बाथरुमसहित सुविधाजनक कोठाहरु छन् ।

आन्तरिक तथा बाह्य पर्यटकहरुको गन्तव्य बन्न सक्ने सो भ्यु टावर सञ्चालनमा नआउँदा पर्यटकीय क्षेत्र ओझेलमा परेको छ । रेष्टुरेन्टदेखि स्विमिङ पुल, बाल उद्यान लगायत रमणीय स्थल, डिपार्टमेन्टल स्टोर, लाइब्रेरी लगायतका संरचना सञ्चालन गरिने बताइएको छ ।