काठमाडौं । भन्सार एजेन्टहरुले आज भन्सार कार्यालयमा काम ठप्प पारेका छन् । उनीहरुले भन्सार ठप्प पार्दा भन्सारबाट आयात हुन कठिनाइ भएको छ ।
अर्थमन्त्री डा. प्रकाशशरण महतले बजेट भाषणमा पाँच लाख रोजगारी सिर्जना गर्ने बताइरहँदा भन्सार एजेन्टहरु भने आठ हजार बढीको रोजगारी खोस्ने काम भएको भन्दै भन्सार ठप्प पारेका हुन् ।
त्रिभुवन अन्तर्राष्ट्रिय विमानस्थलका एक भन्सार एजेन्टले नेपालभरका भन्सार ठप्प पारेको दाबी गरे ।
उनले पहिले एक जना भन्सार एजेन्टले दुई प्रतिनिधि राख्न पाउने भन्ने भएकामा अहिले आएर प्रतिनिधि राख्न नपाउने भएपछि आफूहरुले आन्दोलन गर्नुपरेको बताए ।
प्रतिनिधि आफैँले एक ठाउँबाट मात्र काम गर्नुपर्ने र जहाजबाट सामान धेरै ठाउँबाट विभिन्न माध्यम भएर धेरै ग्राहकको आउने भएकाले एक जना हरेक ठाउँमा पुग्न सम्भव नहुँदा झन् सेवामा ढिलाइ हुने दाबी गरे ।
उनले भने, ‘सामान क्लियर गर्नका लागि कससे कम दुई जना प्रतिनिधि राखेपछि जुनसुकै भन्सारबाट काम छिटो छरितो गर्न पाइन्थ्यो । त्यो व्यवस्था थियो । अहिले त्यो सम्भव नभएपछि आन्दोलन गर्नुको विकल्प रहेन ।’
उनले प्रतिनिधिले पनि काममा सजिलो होस् भन्नका लागि एक दुई जना कर्मचारी राख्ने गरेको बताए ।
यसरी हेर्दा यदि भन्सार एजेन्टले मात्र काम गर्ने हो भने आठ हजारको रोजगारी खोसिने आन्दोलनमा उत्रिएका एजेन्टहरुको दाबी छ ।
त्रिभुवन विमानस्थलका ती एजेन्ट भन्छन्, ‘संशोधन भएर आएको भन्सार नियमावलीले रोजगारी सिर्जनाको सिष्टमलाई नै झन् तहसनहस भयो । उल्टै तिमीहरु काम छाड र विदेश जान्छौ भने अब लागे हुन्छ भनेर भन्नुपर्ने अवस्था आयो ।’
ती एजेन्ट भन्छन्, ‘यहाँ त दाल भातको सवाल आयो । त्यसैले अर्थमन्त्रीज्यू भारतबाट आएपछि आइतबार वार्ता गरेरमात्रै भन्सार खोल्नेछौं ।’
अहिले आठ सयको हाराहारीमा भन्सार एजेन्टहरु रहेका छन् ।
के भन्छ भन्सार विभाग ?
भन्सार विभाग भने लोकसेवा पास गरेर आएका एजेन्ट सक्षम हुने भएकाले उनीहरुले नै काम गर्नुपर्छ भन्ने मान्यतामा रहेको छ ।
एक भन्सार अधिकृतले भने, ‘ऊ लोकसेवा पास गरेर आएको हुन्छ । ऊ सक्षम छ । तर उसले राख्ने प्रतिनिधि सक्षम हुने आधार छैन । विश्वास पनि हुँदैन । त्यसलाई नै कम गर्न खोजिएको हो ।’
विभाग स्रोतका अनुसार कानूनमा भन्सार एजेन्ट नै स्वयं उपस्थित हुनुपर्छ भन्ने कुरा छ । त्यसलाई पनि अहिले भन्सार ऐनमै डिजिटल रुपमा उसले घोषणा गरेकालाई आधिकारिक मान्यता दिने र फिजिकल रुपमै उपस्थित हुनुपर्छ भन्ने वाध्यात्मक अवस्था छैन ।
तर नियमावलीमा त्यस्तो परेका कारणले अप्ठेरो परेको उनको भनाइ छ । उनी भन्छन्, ‘यसलाई हामीले फुकाउँदैछौँ । आइतबारसम्ममा एउटा निर्णय हुन्छ । प्रतिनिधि रहँदैन एजेन्टहरुले डिजिटल्ली सम्प्रेषण गरेकालाई भन्सारले मान्ने भन्ने कुरा छ ।’
उनले भन्सार ठप्प भनेर त्यसो नभएको दाबी गरे । दैनिक अनुमानित एक अर्ब बराबरको राजस्व उठ्दै आएको छ ।
अर्थमन्त्री डा. महत अहिले भारत भ्रमणमा छन् । शनिबार साँझ उनी काठमाडौैं फर्कदैछन् । आइतबार छलफल गरी विषय टुंगिने बताइन्छ ।
तर यसरी एजेन्टमात्र राखेर उसले राख्न पाउने दुई जना प्रतिनिधि राख्न नपाउने र अन्य कर्मचारी पनि नहुने भएपछि नेपालमा थप बेरोजगार बढ्ने निश्चित छ ।
