ला लिगामा रियाललाई अग्रता, बार्सा पाँच अंकले पछि पर्याे
प्रकाशित २०७३ कार्तिक २१ आइतबार
1.7k
Shares
एजेन्सी । स्पेनिश ला लिगा फुटबलमा रियाल मड्रिडले शानदार जित निकाल्दै अग्रता बलियो बनाएको छ । आइतबार साँझ घरेलु मैदानमा भएको खेलमा रियालले लिजेन्सविरुद्ध ३–० को जित निकालेको हो ।
रियाललाई विजयी गराउन ग्यारेथ बेलले दुई तथा अल्भारो मोराटाले एक गोल गरे । बेलले ३८औं र ४५औं मिनेटमा गोल गरे भने, मोराटाले ७७औं मिनेटमा गोल गरे । मुख्य फरवार्ड क्रिश्चियानो रोनाल्डोले भने गोल गर्न सकेनन् । उनले पहेंलो कार्ड पाए । निकै दबाबमा रहेको लिजेन्सका पाँच खेलाडीले पहेंलो कार्ड पाए ।
यो जितसँगै रियालले दोस्रो स्थानमा रहेको बार्सिलोनालाई पाँच अंकले लिड गरेको छ । हालसम्म अपराजित रियालले ११ खेल खेलेको मध्ये आठमा जित र ३ खेल बराबरी गरेको छ । यो सिजन ११औं चरणसम्म अपराजित रहेको रियाल एक्लो टोली हो । गोल अन्तर समेत बार्सिलोना भन्दा तीन अंकले फरक छ ।
शीर्ष स्थान कब्जा गरेको रियालको २७ अंक भएको छ । दोस्रो स्थानको बार्सिलोनाको २२ अंक भएको छ । यो सिजनमा अपेक्षानुसारको प्रर्दशन गरेपछि प्रशिक्षक जिनेदिन जिदान दङ्ग परेका छन् । गत सिजनमा पछारिनै आँटेको रियाललाई उनले कठिन स्थितिबाट जोगाई दोस्रो बनाएका थिए ।
