तम्घास । गुल्मी जिल्लामा सात महिनापछि वर्षा भएको छ । गुल्मीको धुर्कोट गाउँपालिका–१ नयाँगाउँमा सात महिनापछि वर्षा भएको त्यहाँस्थित नवज्योति आधारभूत विद्यालयका प्रधानाध्यापक भागिरथ पोखरेलले जानकारी दिए ।
उनका अनुसार गत असोजपछि पहिलो पटक वर्षा भएको हो । उनले सात महिनापछि आज बिहान वर्षा भएको बताए ।
वर्षा हुन नसक्दा किसानहरु निकै मर्कामा परेको बताउँदै वनमा लागेको डढेलोका कारणसमेत ठूलो क्षति बेहोर्नु परेको बताए ।
वर्षा नभएकै कारण अन्नबाली यसपालि हुन सकेको थिएन । अहिलेसम्म मकैसमेत लगाउन नपाएको किसानहरुको गुनासो छ ।
वर्षा नभएकै कारण सुन्तलाको पकेट क्षेत्र मानिने नयाँगाउँमा यसपालि उत्पादन केही घटेको थियो ।
सात महिनापछि वर्षा भए पनि लामो समयसम्म पानी नपरेर खडेरीको मार खेपेको जमीन भिज्न अलि समय लाग्ने पोखरेलले बताए ।
उनले भने, 'पानी परेको छ । दिनभर पर्ने हो भने बारी र खेत भिज्ने थियो । मकै लगाउने बेला भयो । यसले किसानलाई फाइदा हुने थियो ।'
