काठमाडौँ । गृहमन्त्री रवि लामिछानेमाथि छानबिन समिति बनाउन सहमति नजुटेपछि नेपाली कांग्रेसले राष्ट्रिय सभा बैठक अवरोध गरेको छ । कांग्रेसले राष्ट्रिय सभा बैठक अवरोध गरेपछि बिहीबारको राष्ट्रिय सभा बैठक स्थगित भएको छ । बैठक शुक्रबार १ बजेर १५ मिनेटमा बस्ने गरी स्थगित भएको हो ।
बैठक शुरु भएपछि सभाको कारबाही प्रस्तुत गर्ने क्रममा नेपाली कांग्रेसका सांसदहरूले उठेर विरोध जनाएका थिए ।
कांग्रेसले विरोध जनाएसँगै राष्ट्रिय सभा अध्यक्षले संसद बैठक शुक्रबार सम्मका लागि स्थगित गरेका हुन् । सो क्रममा राष्ट्रिय सभा अध्यक्ष नारायणप्रसाद दाहालले राष्ट्रिय सभाको ७ वर्षको इतिहासमा नयाँ नयाँ पन देखिन थालेको महसुस भएको बताए ।
उनले राष्ट्रिय सभामा विरोध गर्ने कुराले सबैलाई अप्ठ्यारो भएको र बाहिर नयाँ किसिमको परिचर्चा शुरु भएको बताए ।
