काठमाडौँ । एमालेबाट विभाजित भएको तीन वर्षपछि नेकपा एकीकृत समाजवादीको महाधिवेशन हुने भएको छ । आसन्न १० औँ राष्ट्रिय महाधिवेशनका लागि राजनीतिक तथा सुरक्षा निकाय समन्वय कमिटी गठन गरी तयारी पूरा गरेको छ । 

असार १६ देखि २० गतेसम्म काठमाडौँमा १० औँ राष्ट्रिय महाधिवेशन गर्ने भएको छ । जेठ ३ देखि ७ गतेसम्म हुने भनिएको महाधिवेशन आन्तरिक तयारी अपुग भएकाले सारिएपछि महाधिवेशनको तयारी तीव्र रुपमा थालिएको छ । 

महाधिवेशन नजिकिएसँगै नेताहरूले नेतृत्व हात पार्ने कसरतमा लागेका छन् । अहिलेसम्म अध्यक्ष पदका प्रमुख दाबेदारमा माधवकुमार नेपाल र सम्मानित नेता झलनाथ खनाल देखिएका छन् । माधव नेपालले सहमतिमै नेतृत्व चयन गर्ने बताइसकेका छन् भने खनालले यो विषयमा मुख खोलेका छैनन् ।

तल्लो तहका कतिपय नेताहरुले नयाँ पुस्ताबाट नेतृत्व चयन हुनुपर्ने आवाज उठाइरहेका छन् । उनीहरुले राजेन्द्र पाण्डे, महासचिव घनश्याम भुसाललाई अध्यक्षको तयारी गर्न सुझाव दिएका छन् ।

यद्यपि भुसालले यसबारे मुख खोलेका छैनन् । कतिपयले भीम रावललाई पार्टीमा ल्याएर नेतृत्व दिनुपर्ने सुझाव पनि दिइरहेका छन् । यद्यपि रावलले अहिले एमाले छाडिसकेका छैनन् । 

भुसालले अध्यक्षमा दाबी गर्ने संभावना निकै कम छ । महासचिवका लागि उपमहासचिव जगन्नाथ खतिवडा र प्रकाश ज्वाला लागिरहेका छन् । 

प्रचार विभाग प्रमुख भएकाले देशव्यापी नेटवर्क हुँदा उनले महासचिव दावी गरिरहेका छन् । 

नेपाल र खनालमध्ये जो अध्यक्ष भए पनि खतिवडालाई महासचिवका लागि साथ दिने बताइएको छ । 

भुसाल, खतिवडा र ज्वाला नै दाबेदार भएपछि चुनावबाटै महासचिव चयन हुने सम्भावना छ ।  

महासचिवमा चुनाव भएमा खतिवडाले जित्न सक्ने आँकलन गरिएको छ । स्रोतका अनुसार एकीकृत समाजवादीको अध्यक्ष सहमतिबाटै चयन गर्ने प्रयास भइरहेको छ । तर खनालले अध्यक्षमा दावी गरेकाले नेपाललाई पेचिलो अवस्था सिर्जना भएको छ ।

अध्यक्षका लागि एकसाथ अघि बढेका नेपाल र खनालबीच सहमति गराउन नेताहरू खटिएका छन् । अहिले एकीकृत समाजवादीमा राजनीतिक प्रतिवेदन लेखनको कार्य भइरहेको छ ।

सकेसम्म एउटै राजनीतिक प्रतिवेदन बनाएर अघि बढ्ने तयारी रहेको छ । नेकपा एमालेबाट २०७८ भदौ ९ गते विभाजन भएर बनेको एकीकृत समाजवादीले पहिलो पटक महाधिवेशन गर्न लागेको हो । 

त्यसो त एकीकृत समाजवादीभित्र सचिव रहेकी रामकुमारी झाँक्री लगायतले पनि उच्च तहको पदाधिकारीमा रुचि देखाएका छन् । भुसालले अध्यक्षमा उम्मेदवारी दिएमा त्यही अनुसार प्यानल बन्न सक्छ । 

यस्तै सम्मानित नेता खनालले अध्यक्षमा उम्मेदवारी दिएमा उनको पनि प्यानलै बन्ने नेताहरू बताउँछन् । वर्तमान परिस्थितिमा पार्टीले ध्यान दिनुपर्ने समसामयीक विषयहरू भन्दै  खनालले सैद्धान्तिक र नीतिगत सवालमा एमाले भन्दा भिन्न पार्टी देखाउनुपर्ने र पार्टी तथा सङ्गठन विस्तार गर्नुपर्ने भन्दै नेतृत्वको ध्यानाकर्षण गराउँदै आफूले पार्टीको नेतृत्व लिनुपर्ने आशय व्यक्त गरिरहेका छन् ।

ठूलो संख्यामा विद्रोह गरेर अघि आएका नेता–कार्यकर्ताहरू वैचारिक–सैद्धान्तिक भिन्नता नदेखेर एमालेमा फर्किने क्रम देखिएकाले गम्भीर समीक्षा हुनुपर्ने खनालको भनाइ छ । 

उनले वैचारिक तथा संगठनात्मक दुवै क्षेत्रबाट देखिएका कमजोरीलाई हटाएर पार्टीलाई एउटा सबल, सशक्त र धारिलो क्रान्तिकारी जगमा उभ्याउनुपर्नेसमेत उल्लेख गर्दै आएका छन् ।

एमालेका प्रचार विभाग प्रमुख जगन्नाथ खतिवडाले महाधिवेशन हुने निश्चित भैसकेको र पार्टी नेतृत्वका लागि आफ्नै किसिमका चाहनाहरु भएकाले खुला छलफल हुने बताएका छन् । 

उनले पार्टीको नेतृत्व सकेसम्म सहमतिबाटै चयन हुने बताएका छन् । ‘आंकाक्षा हुन सक्छन् तर पार्टीलाई सबल बनाउर लैजाने पक्षमा सबै नेतहरु एकमत भएकाले नेतृत्वको चयन सर्वसम्मतिमै हुने अपेक्षा गरिएको छ’, प्रचार विभाग प्रमुख खतिवडाले भने ।