अदालतको आदेश विपरीत बालेनले दुःख दिएको भन्दै सडकमा उत्रे कबाड व्यवसायी [फोटोफिचर]

हाम्रा कुरा

प्रकाशित २०८१ असार २ आइतबार

काठमाडौँ । अदालतको आदेश विपरीत काठमाडौँ महानगरपालिकाले कबाड व्यवसायीमाथि गरेको तोडफोडको विरुद्धमा शान्ति सुरक्षा एवं क्षतिपूर्तिको माग गर्दै काठमाडौँमा आइतबार कबाड व्यवसायीले प्रदर्शन गरका छन् ।

माइतीघरमण्डलाबाट शुरु भएको र्याली नयाँबानेश्वर पुगेर कोणसभामा परिणत भएको थियो । सयौँको सहभागितामा निकालिएको सो र्यालीमा सहभागीहरुले काठमाडौँ महानगरपालिकाका मेयर वालेन्द्र साह (बालेन) विरुद्धमा चर्को नाराबाजीसमेत गरेका छन् ।

‘हामी यहाँ छौँ, बालेन तिमी कहाँ छौं’, ‘कबाड व्यवसायीलाई सुरक्षा दे’ लगायतका नारा उनीहरुले लगाएका छन् । यस्तै प्रदर्शनमा ‘छोटे राजाहरुको आतंक बन्द गर, कबाड व्यवसायीको रक्षा गर, कानूनी शासन लागू गर, अदालतको निर्णयको सम्मान गर’ जस्ता नाराहरु आन्दोलनकारीले लगाएका छन् ।

काठमाडौँ महानगरपालिकाले अदालतको आदेश विपरीत तोडफोडमा उत्रिएपछि कवाड व्यवसायी संघर्ष समितिले काठमाडौँ उपत्यकाभित्र कबाड व्यवसायीहरुको सुरक्षा, समृद्धि र सम्मानका लागि बाध्य भएर आन्दोलनमा उत्रिएको कबाड व्यवसायीका नेता संजय साहले जनाएका छन् ।

पछिल्लो समय बालेनले कानून तथा अदालतको अन्तरिम आदेश विपरीत दुःख दिन थालेपछि आन्दोलनमा उत्रिन बाध्य भएको साहले बताए ।

आफूहरुको माग सम्बोधन नभए माइतीघरमा धर्ना एवं प्रदर्शन मात्रै नभई कबाड व्यवसायीहरुले ४ असारमा काठमाडौँ महानगरपालिकासमेत घेराउ गर्ने जनाएका छन् ।