काठमाडौँ । अहिले देशैभर वर्षा भइरहेको छ । गत मंगलबार पूर्वबाट शुरु भएको यो झरी बिहीबार देशैभर पुगेको छ । जसका कारण जनजीवन अस्तव्यस्त भएको छ ।
मौसम पूर्वानुमान महाशाखाले शुक्रबार र शनिबारलाई त भारी वर्षा हुने भन्दै सचेत रहन आग्रह गरिसकेको छ । देशभर मनसुनी वायुको प्रभाव रहेका कारणले विभिन्न नदी क्षेत्रहरुमा खतराको घण्टी बजाइएको छ ।
भारतको उत्तर मध्य महाराष्ट्र र आसपासको क्षेत्रमा रहेको न्यून चापीय प्रणालीको पनि प्रभाव नेपालमा रहेसँगै असोजमा झरी परिरहेको छ ।
काठमाडौँ उपत्यकामा पनि भारी वर्षा भएको छ । बिहीबार बेलुकीदेखि निरन्तर वर्षा भइरहेको छ । वरिपरिका खोलाहरुले खतराको घण्टी बजाइसकेका छन् । ठाउँठाउँमा डुबान भएको छ ।
यस्तो मौसमबीच पनि बाहिर निस्कनेहरुका लागि सकस भएको छ । काठमाडौँका विभिन्न स्थानमा सवारी साधनमा बाहिर निस्केकादेखि लिएर पैदल हिँड्नेसम्मलाई अप्ठेरो भएको छ ।
