मन्त्री चौधरीको दाबी- नेपालमा भारतबाट सबैभन्दा धेरै ड्रग्स आउँछ [भिडियो]

दुई देशको बीचमा ड्रग्स नियन्त्रणमा कसरी काम गर्ने भन्नेबारेमा छलफल गर्न नेपाल सरकार तयार

हाम्रा कुरा

प्रकाशित २०८१ कार्तिक २५ आइतबार

काठमाडौँ । युवा तथा खेलकुद मन्त्री तेजुलाल चौधरीले नेपालमा भारतबाट सबैभन्दा धेरै ड्रग्स आउने गरेको बताएका छन् । आइतबार काठमाडौंमा एक कार्यक्रममा बोल्दै उनले नेपाल र भारतबीचको खुला सीमानाले पनि ड्रग्स सप्लाइ हुन सहज हुने गरेको बताए । उनले नेपालमा विद्यालय स्तरबाटै चुरोट सेवन गर्ने र युवावस्थामा ड्रग्स सेवन गर्ने क्रम बढ्दो रहेकाले नियन्त्रणको आवश्यकता रहेको बताए ।

उनले सरकारले नियन्त्रणका लागि विभिन्न ऐन, कानून निर्माण गरेको भए पनि चाहेको जति नियन्त्रण हुन नसकेको बताए । उनले नेपालमा ड्रग्स उत्पादन गर्ने कुनै कम्पनी नभए पनि भारतबाट खुला सीमानाका कारण बढी ल्याइने गरेको बताए । दुई देशको बीचमा ड्रग्स नियन्त्रणमा कसरी काम गर्ने भन्नेबारेमा छलफल गर्न आफूहरू तयार रहेको बताए ।

उनले भने, ‘नेपालमा ड्रग्सको विषयमा भन्नुपर्दा विद्यालय स्तरबाटै चुरोट बिँडीको लत विद्यार्थीले शुरु गर्दछन् । विद्यालय स्तरबाटै यहाँका विद्यार्थी विभिन्न कारणले चुरोट, बिँडी, कक्षा नौ वा १० कक्षाबाट नै खान शुरु गर्दछन् । अलि ठूलो भएपछि ड्रग्स खान शुरु गर्दछन् । भारतबाट वा अन्य तेस्रो मुलुकबाट ल्याएर खाने गर्दछन् । जसकारणले युवाहरु अपाङ्ग भएका छन् । नेपाल सरकारले यसको नियन्त्रणमा विभिन्न ऐन, कानून बनाएको पनि छ । तर जति ड्रग्सको विषयमा विश्व चिन्तित छ, नेपालमा ड्रग्स उत्पादन गर्ने कुनै कम्पनी त छैन । तर ड्रग्स सप्लायर्स भारतबाट नै धेरै हुने गर्दछ । खुला सीमाका कारण वा अन्य कुनै कारण । खुला बोर्डर छ, गोजीमा राखेर पनि ल्याउँछ, यसको कुनै शङ्का उपशङ्का छैन । त्यसैले दुई देशको बीचमा ड्रग्स नियन्त्रणमा कसरी काम गर्ने भन्नेबारेमा छलफल गर्न नेपाल सरकार तयार छ ।’