महिला एसिया कप क्रिकेटमा पाकिस्तानमाथि नेपालको शानदार जित
नेपाल एक खेलअघि नै सुपर फोरमा, मंगलबार भारतसँग खेल्ने
हाम्रा कुरा
प्रकाशित २०८१ पुष १ सोमबार
675
Shares
काठमाडौँ । यू–१९ महिला एसिया कप टी–२० क्रिकेटमा नेपालले पाकिस्तानलाई पराजित गरेको छ । मलेसियाको क्वालालम्पुरमा सोमबार भएको खेलमा नेपालले पाकिस्तानलाई ६ विकेटले हराएको हो ।
खेलमा पाकिस्तानले पहिले ब्याटिङ गर्दै निर्धारित २० ओभरको खेलमा ५ विकेट गुमाएर १०४ रन बनायो ।
ओपनर कोमल खानले ४२ बलमा ३८ तथा महम एन्नेसले ३९ बलमा २९ रन बनाइन् ।
नेपालका लागि कप्तान पूजा महतोले २ तथा रचनाकुमारी चोधरी, रिया शर्मा तथा सीमना केसीले १–१ विकेट लिए ।
जवाफमा १०५ रनको सामान्य चुनौती नेपालले १९ ओभरमै ४ विकेटको क्षतिमा पूरा गरेको हो ।
नेपालका लागि कप्तान पूजा महतोले अलराउन्ड प्रदर्शन गर्दै ४७ बलमा अविजित रहँदै ४७ रन बनाइन् ।
त्यस्तै सोनी पाख्रिनले १३ तथा सीमना केसीले अविजित रहँदै १२ बलमा १२ रन बनाइन् ।
पूजा महतोको कप्तानीमा नेपालले पहिलो पटक विश्वकप टी–२० क्रिकेटमा स्थान बनाएको छ ।
विश्वकपमा छानिएसँगै नेपालले पहिलो पटक आयोजना भएको टी–२० एसिया कपमा पनि स्थान बनाएको हो ।
नेपालले मंगलबार बिहान ११ः४५ बजे भारतसँग खेल्दैछ । समूह ए मा नेपाल, भारत र पाकिस्तान रहेका छन् ।
भारतले यसअघि पाकिस्तानलाई ९ विकेटले हराएको थियो । दुवै खेल हारेसँगै पाकिस्तान बाहिरिएको छ भने नेपाल भारतसँग खेल्नुअघि नै सुपर फोरमा पुगेको छ ।
अर्को समूहमा श्रीलंका, बंगलादेश र मलेसिया रहेका छन् । श्रीलंका एक जित र एक हारसहित सुपर फोरमा पुगेको छ ।
बंगलादेशले एक खेल जितेको छ भने अन्तिम भिडन्त मलेसियासँग हुँदैछ ।
