सिरहा-माडर सडक निर्माणमा गुणस्तरहीन कामको आरोप, स्थानीयद्वारा प्रदर्शन
हाम्रा कुरा
प्रकाशित २०८२ असार ३२ बुधबार
685
Shares
सिरहा। जिल्ला सदरमुकाम सिरहा हुँदै भारतसँगको सीमावर्ती बजार माडर जोड्ने सडकअन्तर्गत माडर बजार क्षेत्रमा गरिएको आरसीसी ढलानको काम गुणस्तरहीन भएको भन्दै स्थानीयले मंगलबार दिनभर विरोध प्रदर्शन गरेका छन्।
स्थानीयले सरकारी निकाय र ठेकेदार कम्पनीबीचको मिलेमतोमा योजनाबमोजिमको मापदण्ड नअपनाई कमसल सामग्री प्रयोग गरिएको आरोप लगाएका छन्। स्थानीय रामकुमार यादवले भने, “माडरको कालि मन्दिरबाट भन्सार जाने बाटोको ६० मिटर सडकमा गत आइतबार राति गरिएको ढलानमा गिट्टी, बालुवा र सिमेन्टको अनुपात नमिलाई कमसल निर्माण गरिएको छ। सोमबार बिहानै अनुगमनका क्रममा लट्ठीले घोच्दा पनि सडक फुट्ने देखियो।”
सिरहा नगरपालिका–१७ का वडाध्यक्ष उमेशप्रसाद यादवका अनुसार, गुणस्तरहीन निर्माण भएपछि नगरपालिकाका प्राविधिक र प्रहरी बोलाएर अनुगमन गरिएको छ। निर्माण व्यवसायीको मिक्स्चर र पानीट्याङ्कर नियन्त्रणमा लिएर इलाका प्रहरी कार्यालयमा बुझाइएको छ।
निर्माण कम्पनीका साइट इन्जिनियर सञ्जीव साहले मजदुरको त्रुटिका कारण समस्या भएको स्वीकार गरेका छन्। उनले अब प्राविधिक परीक्षण गरिने जानकारी दिँदै भने, “आइतबार रातिको ढलानमा घोल्दा गल्तीले छिटो जम्ने केमिकल बढी प्रयोग भएको हो। निर्माण सामग्रीको अनुपात नमिलेको होइन।”
योजनाअन्तर्गत सिरहा सदरमुकामबाट माडरसम्मको १,३०० मिटर सडकमा दुवैतर्फ वर्षा यामको पानीको निकासका निम्ति नाला निर्माण, ग्राभेल, माटो भर्ने, आरसीसी ढलान र विद्युत् पोल सार्ने कार्य समावेश छ। संघीय सडक सुपरीवेक्षण तथा अनुगमन कार्यालयअन्तर्गत सडक डिभिजन कार्यालयले रु ६ करोड ५८ लाख ५३ हजार ८१० मा यो सडक निर्माणको सम्झौता भएको हो।
