इङलिश प्रिमियर लिग फुटबलः म्यानचेष्टर सिटी र म्यानचेष्टर युनाइटेड विजयी

प्रकाशित २०७३ माघ २४ सोमबार

इत्तेहाद स्टेडियम । इङलिश प्रिमियर लिग फुटबलमा म्यानचेष्टर सिटी र म्यानचेष्टर युनाइटेड विजयी भएका छन् । सिटीले आइतबार राति घरेलु मैदान इत्तेहाद स्टेडियममा भएको खेलमा स्वान्सी सिटीलाई २–१ ले हरायो ।

खेलको ११ मिनेटमै आब्रिअल जिससले गोल गर्दै म्यानचेष्टरलाई अग्रता दिलाए । ८१ औं मिनेटमा सिगुड्सनले गोल गर्दै स्वान्सीलाई बराबरीमा ल्याए । खेल बराबरीमै सकिने लगभग पक्का भइसकेको थियो । अन्तिम घडीमा जिससले फेरि अर्को गोल थप्दै म्यानचेष्टर सिटीलाई महत्वपूर्ण तीन अंक दिलाए ।

त्यस्तै अर्को खेलमा म्यानचेष्टर युनाइटेडले डिफेन्डिङ च्याम्पियन लेस्टर सिटीलाई ३–० ले हरायो । लेस्टरकै मैदान किङ पावर स्टेडियममा भएको खेलमा म्यानचेष्टर युनाइटेडलाई जिताउन हेन्रिक खित्रायन, ज्लाटान इब्राहिमोभिच र हुँवा माटाले एक एक गोल गरे ।

यी खेलपछि लिगमा २४ औं चरणका खेल पूरा भएका छन् । ५९ अंकसहित चेल्सी शीर्ष स्थानमा कायमै रहेको छ । दोस्रो स्थानको टोटनह्यामको ५० अंक छ । ४९ अंकसहित म्यानचेष्टर सिटी तेस्रो स्थानमा छ ।

४७ अंकको आर्सनल चौथो स्थानमा छ । ४६ अंकको लिभरपुल पाँचौं स्थानमा छ । उपाधि होडबाट टाढिएसंगै शीर्ष चारभित्र पर्न संघर्षरत म्यानचेष्टर युनाइटेडको ४५ अंक छ ।