प्रशासन चलाउने शक्ति 'पदमा होइन, विश्वासमा हुन्छ': मुख्यसचिव अर्याल
हाम्रा कुरा
प्रकाशित २०८२ मंसिर ९ मंगलबार
1k
Shares
काठमाडौँ। ३५ वर्षको सरकारी सेवापछि आज (मङ्गलबार) अनिवार्य अवकाशमा जान लागेका मुख्यसचिव एकनारायण अर्यालले प्रधानमन्त्री तथा उच्च अधिकारीहरूको उपस्थितिमा आयोजित विदाइ समारोहमा बोल्दै प्रशासन चलाउने शक्ति 'पदमा भन्दा पनि विश्वासमा रहेको' बताएका छन्।
मुख्यसचिव अर्यालले आफ्नो ३५ वर्षको अनुभवबाट "नागरिकको विश्वास, सहकर्मीको विश्वास, र संस्थाको विश्वास प्राप्त भए नतिजामा कार्यसम्पादन गर्न सकिन्छ" भन्ने पाठ सिकेको उल्लेख गरे। उनले सरकारी सेवामा प्रशंसाभन्दा बढी चुनौती, आलोचना र असहज परिस्थितिहरू आउने र कुनै पनि राष्ट्रिय सेवक प्रश्नबाट भाग्न नसक्ने बताए। उनले विशेषगरी संवेदनशील क्षण र निर्णायक अवस्थाहरूमा सधैँ सबै पक्षलाई सन्तुष्ट पार्न नसकिने यथार्थ पनि औँल्याए।
उनले जेन-जी आन्दोलन, राष्ट्रिय सम्पत्तिको रक्षा, र शान्ति व्यवस्थापन जस्ता चुनौतीपूर्ण परिस्थितिहरूमा उपलब्ध साधन र सूचनाका आधारमा सकेसम्म उचित निर्णय लिने प्रयास गरेको बताए। उनले संघीय निजामती सेवा र कानूनी संरचनामा देखिएका कमजोरी तथा नेतृत्व विकासमा अवरोध पुर्याउने व्यवस्थाहरूविरुद्ध आफूले खुला धारणा राखेको र ती विषयहरू व्यक्तिगत विवाद नभएर संस्थागत सुधारको अनिवार्यता रहेको बताए।
सेवा निवृत्त हुँदै गर्दा मुख्यसचिव अर्यालले वैदेशिक रोजगार प्रणालीलाई डिजिटल दायरामा लैजानु, सेवा प्रवाह सहज बनाउनु, सामाजिक सुरक्षा विस्तार, निजामती सेवा अस्पताल तथा इमिग्रेसन सेवा सुधार, र सुशासनको दिशामा गरिएका प्रयासहरू निजामती सेवाको सामूहिक उपलब्धि भएको बताए। उनले जेन-जी आन्दोलनले नागरिकले उत्तरदायित्व, पारदर्शिता र सहज सेवा चाहेको स्पष्ट सन्देश दिएको उल्लेख गर्दै निजामती सेवामा सुधार गर्ने साहस, न्यायपूर्ण निर्णय गर्ने इमान र नागरिकप्रति संवेदनशीलता नखस्काउन आग्रह गरे।
मुख्यसचिव अर्याल २०४६ साल माघ ४ गतेबाट सरकारी सेवामा प्रवेश गरेका थिए र उनी ५८ वर्षे उमेरहदका कारण अवकाशमा जान लागेका हुन्।
