काठमाडौं । आगामी फागुन २१ गते हुने प्रतिनिधि सभा निर्वाचनका लागि आज धनुषा क्षेत्र नम्बर ३ मा पनि उत्साहजनक रूपमा मनोनयन दर्ता भएको छ। यस क्षेत्रबाट विभिन्न राजनीतिक दलका हेभिवेट र चर्चित युवा अनुहारहरूले आफ्नो उम्मेदवारी दर्ता गराएपछि चुनावी सरगर्मी निकै बढेको छ।
नेपाली कांग्रेसका तर्फबाट पूर्वउपप्रधानमन्त्री एवं प्रभावशाली नेता विमलेन्द्र निधिले आफ्नो उम्मेदवारी दर्ता गराएका छन्। निधिलाई यस क्षेत्रको अनुभवी र पुराना खेलाडीका रूपमा हेरिएको छ। त्यस्तै, नेकपा (एमाले) बाट वर्तमान सांसद एवं पूर्वमन्त्री जुली कुमारी महतो (महासेठ) ले पुनः उम्मेदवारी दर्ता गराएकी छन्। २०७९ को निर्वाचनमा यसै क्षेत्रबाट निर्वाचित भएकी महतोले आफ्नो विरासत जोगाउने प्रयास गर्नेछिन्।
यसपटकको निर्वाचनमा नयाँ शक्तिका रूपमा राष्ट्रिय स्वतन्त्र पार्टी (रास्वपा) बाट प्रवक्ता मनिष झाले उम्मेदवारी दर्ता गराएका छन्। समानुपातिक सांसदबाट राजीनामा दिएर प्रत्यक्षतर्फ उत्रिएका झालाई नयाँ पुस्ताको बलियो प्रतिस्पर्धीका रूपमा हेरिएको छ। त्यस्तै, राष्ट्रिय मुक्ति पार्टीबाट राजीव झा र नेपाली कम्युनिस्ट पार्टीका तर्फबाट राम ललित मण्डलले पनि मनोनयन दर्ता गराएका छन्। मधेशका मुद्दा र विकासका एजेन्डालाई अघि सार्दै लोकतान्त्रिक समाजवादी पार्टी (लोसपा) बाट परमेश्वर साह सुडी पनि चुनावी मैदानमा उत्रिएका छन्।
धनुषा-३ मा पुराना अनुभवी र नयाँ जोशिला उम्मेदवारहरूबीचको यो त्रिकोणीय एवं बहुकोणीय भिडन्तले यस क्षेत्रलाई देशकै 'हट सिट' को रूपमा स्थापित गरेको छ। उम्मेदवारहरूले आजै जनकपुरधामस्थित निर्वाचन अधिकृतको कार्यालयमा आफ्ना समर्थक र बाजागाजासहित पुगेर मनोनयन पत्र बुझाएका हुन्।
