क्याम्प नोउ । स्पेनिश लिग फुटबल ला लिगामा डिफेन्डिङ च्याम्पियन बार्सिलोनाले शीर्ष स्थानको रियाल मड्रिडसंग अंक दूरी कम गरेको छ । आइतबार राति भएको खेलमा लेगनेसलाई घरेलु मैदान क्याम्प नोउमा २–१ ले हराउँदै बार्सिलोनाले शीर्ष रियालसंग अंक दूरी अन्तर एकमा झारेको हो ।
बार्सिलोनालाई जिताउन दुवै गोल लिओनल मेसीले गरे । चौथो मिनेटमै पहिलो गोल गरेका मेसीले अन्तिम मिनेटमा पेनाल्टीमार्फत अर्को गोल गरेका हुन् । लेगनेसले ७१ औं मिनेटमा उनाइ लोपेजको गोलबाट बराबरी गरेपछि बार्सिलोनालाई खेल जित्न निकै संघर्ष गर्नुपरेको थियो ।
यो जितपछि २३ खेलबाट बार्सिलोनाको ५१ अंक भएको छ । तर दुई खेल कम खेलेको रियाल मड्रिडको भने ५२ अंक छ ।
रियालले लगातार तीन खेलमा पराजय भोगेमात्र बार्सिलोनाले अग्रता लिने देखिन्छ । जुन असम्भवजस्तै छ ।
२३ खेलबाट ४९ अंकको सेभिया तेस्रो स्थानमा छ ।
