अमेरिकाले बक्यौता नतिर्दा संयुक्त राष्ट्रसङ्घ आर्थिक सङ्कटमा
जुलाईसम्म बजेट सकिने चेतावनी
हाम्रा कुरा
प्रकाशित २०८२ माघ २८ बुधबार
2.2k
Shares
काठमाडौँ । संयुक्त राष्ट्रसङ्घले अमेरिकाबाट अपेक्षित रकम प्राप्त नहुँदा गम्भीर आर्थिक सङ्कटको सामना गरिरहेको छ। महासचिव एन्टोनियो गुटेरेसले सबै सदस्य राष्ट्रले समयमै शुल्क तिर्न नसकेमा र सङ्गठनका वित्तीय नियमहरूमा सुधार नगरिएमा संयुक्त राष्ट्रसङ्घ ठुलो आर्थिक जोखिममा पर्न सक्ने चेतावनी दिएका छन्।
संयुक्त राष्ट्रसङ्घका अधिकारीहरूका अनुसार अमेरिकाले नियमित सञ्चालन बजेटका लागि मात्रै करिब दुई अर्ब डलर तिर्न बाँकी छ, जसमा यस वर्षको करिब सात करोड ६७ लाख डलर समेत समावेश छ। नियमित बजेटका अतिरिक्त शान्ति स्थापना कार्यका लागि छुट्याइएको छुट्टै बजेटमा पनि अमेरिकाको ठुलो हिस्सा बक्यौता रहेको छ।
महासचिव गुटेरेसका अनुसार यदि आवश्यक रकम समयमै प्राप्त भएन भने यस वर्षको जुलाईसम्ममा नियमित बजेट पूर्ण रूपमा सकिन सक्छ, जसले सङ्गठनका विश्वव्यापी गतिविधिहरूमा गम्भीर असर पार्ने सम्भावना छ। हालसम्म करिब ६० देशले मात्र तोकिएको समयभित्र आफ्नो वार्षिक शुल्क भुक्तानी गरिसकेका छन् भने नियमित बजेटतर्फको अधिकांश बक्यौता अमेरिकाकै भागमा परेको छ।
अमेरिकी प्रतिनिधिले आगामी केही हप्ताभित्र आफ्नो प्रशासनले बाँकी रकमको आंशिक भुक्तानी गर्ने योजना बनाइरहेको जानकारी दिएका छन्। यस विषयमा महासचिव र अमेरिकी अधिकारीहरूबीच निरन्तर संवाद भइरहेको संयुक्त राष्ट्रसङ्घले जनाएको छ।
