वेम्बले । इङलिश फुटबल प्रतियोगिता लिग कपको उपाधि म्यानचेष्टर युनाइटेडले जितेको छ । आइतबार राति घरेलु मैदान वेम्बलेमा खेलेको म्यानचेष्टर युनाइटेडले फाइनलमा साउथह्याम्पटनलाई ३–२ ले हरायो । म्यानचेष्टरलाई जिताउन ज्लाटान इब्राहिमोभिचले दुई तथा जेसी लिंगार्डले एक गोल गरे ।
२–० ले पछि परेको अवस्थामा साउथह्याम्पटनका मानोलो गाबिआदिनीले गोल गर्दै बराबरी गरे पनि ८७ औं मिनेटमा ज्लाटानले गोल गर्दै म्यानचेष्टर युनाइटेडलाई निर्धारित समयभित्रै जिताए ।
यो जितले सबैभन्दा ठूलो राहत म्यानचेष्टर युनाइटेडका म्यानेजर होजे मौरिन्होलाई भएको छ । मौरिन्होले टिम सम्हालेपछि म्यानचेष्टर युनाइटेडलाई पहिलो उपाधि दिलाएका हुन् ।
त्यसैगरी उनले लिग कपको उपाधिको संख्या चार बनाएका छन् । यसअघि उनले चेल्सीलाई तीन वटा उपाधि दिलाएका थिए ।
त्यसैगरी खेलाडी करियरबाट टाढिँदै गरेका म्यानचेष्टर युनाइटेडका स्ट्राइकर वाइने रुनीले पनि लिग कप उपाधिमाथि ह्याट्रिक गरेका छन् ।
यो उपाधिसंगै म्यानचेष्टर युनाइटेडले प्रिमियर लिगमा पनि सुधारिएको प्रदर्शन गर्ने अपेक्षा गरिएको छ ।
